23‏/08‏/2008

نحن نتمضرط في غوانتانامو الكويت


نعم  جوانتاناموا الكويت
تقدر ان تتمضرط فيه
الاثنين مو اللي فات اللي قبله قاعدين بالديوانية و نتكلم عن  المصطلحات اللغوية ففجأنا زميلنا  عندما روى لنا حكاية
قال انه ذهب الى البحرين وذهب الى بيت صديق له فخرج ابنه وساله عن والده
فقال له الوالد ثواني و يجي  لأنه قاعد يتمضرط
يتمضرط
صاحبنا اطلعت عيونه شهالولد وقلت الادب فلما اتى صديقه فقال له عن سلوك ابنه
فرد عليه وقال له نعم كنت اتمضرط  يعني كنت اتيددأتوضئحق الصلاة
المراد
هذا الاسم السيئ السمعة هل نرضاه لصيقا بالكويت لأجل 72 ساعة قضاها بشار الصايغ و خرج سالما معافى ما عدا قرصة على زنده هذا ما اثار فعلا استيائي بالموضوع
غوانتاناموا يا بشار الاسم اللي محد يشتهي حتى اللي اسسه متبري منه تجي و تلصقه بالكويت كفو على هيك وطنية
اي بالمقابل انت  حطيت صفات و اعمال اللي يعملون بجوانتاناموا بالكويتيين اللي يعملون هناك ، شوفوا شنو غوانتاناموا ، كيفك وشأنك و من حقك انك تطرح كتاب تكتب فيه احداث 72 ساعة التي قضيتها
عالطاري الكتاب
تخيلوا معاي 72 ساعة تبي تسردها بكتاب كم عدد الصفحات راح تكون من اللحين اقولكم عددها 288 صفحة اشلون يا  حجي حاكي عقالي عرفت
بسيطة حسبوها كل صفحة ربع ساعة طبعا راح يخلي صفحات بيضا معناها ان نام و صفحات لأ ، لأن حلم فيها
سؤال يطرح نفسه و يهبد هباد
هل رفعت قضية على من قرصوا  زندك هل زميلك  اللي خرعوه بالكلاب عزكم الله ( مع اني ما اظن يخرعونه بالكلاب لأنها اهي تخترع لو هوش لها ما شاء الله عليه) رفع قضية
امممم اذن النيابة بذمتكم و سؤال لكم كاكويتيين طبعا اكيد لكم اقرباء بالداخلية أسألوهم فقط  عن اذن النيابة و هل هو بالصعوبة استخراجه
مع الاسف البعض سينط و يقول الوطنية و العمل الوطني
اقوله استريح حدك عندما تدافع المدونيين لما حدث لبشار كان على اساس غياب المعلومة لماذا تم اعتقاله هل بسبب ما ينشره او ما يكتبه هذه كانت هي النقطة الارتكازية
اذا لا  نقعد نتشدق بكلمة حرية التعبير اي أنه لم يتم اعتقال بشار لكتباته كاصحفي بل لأنه راعي منتدى واحد خربط عنده و مس الدستور ، بلا مزايدات  على بعض و يا بشار لا تهين الكويت بالصاقك هذا الاسم  الزفر لها
شيلوه شيلوووووووه
نفس ما قال بو كارم الشمالي لما شالوك لكن هالمره شيل هالاسم العره من مذكراتك

تغيير زي المسجونين بالسجون الكويتية بنفس لون زي سجن غوانتانامو احتمال اقتراح جديد يقدمونه اعضاء التحالف بدور الانعقاد القادم

هناك 66 تعليقًا:

tota يقول...

كفو والله ياحاكي عقالي
...


المشكلة
ليش ما رفع قضية عليهم ??

بس شاطر بتشويه سمعة ديرتنا الله لا يبارج فيه

!

Blog 3amty يقول...

مدونا الولد تعالى عقالك


صاير حكومي !
شقصتك !

التوبه ما قبل رمضان :P

kuwaitawy يقول...

خالي حاكي عقالي


بالعقل


تم اعتقال بشار الصايغ لأنه صاحب منتدى وهالمنتدى هذا فيه عضو مس الدستور

شي طبيعي يسحبونه امن الدولة

وبالنسبة لزميله جاسم

تم اعتقاله لأنه كان قاعد يصور الحدث


بهالسهولة والبساطه

ليش كل هالمبالغه

kuwaitawy يقول...

خالي حاكي عقالي


بالعقل


تم اعتقال بشار الصايغ لأنه صاحب منتدى وهالمنتدى هذا فيه عضو مس الدستور

شي طبيعي يسحبونه امن الدولة

وبالنسبة لزميله جاسم

تم اعتقاله لأنه كان قاعد يصور الحدث


بهالسهولة والبساطه

ليش كل هالمبالغه

EXzombie يقول...

حرية

بو وليد ليش ما سمعنا الثنين يتحركون حق الفضالة، و لا علشان مو من التحالف.....؟!؟

عنصر وطني يقول...

يفترض اذا مارفع قضية على الداخلية
بما أنه عاش في سجن ومعاملتة مثل غوانتانامو الامريكية
ما يصدر مثل هذا الكتاب واذا صدر يكون عنوانة أخف وطأة من هذا العنوان ويسلط الضوء على الداخلية وليس طرف آخر
هذة وجهة نظري

فريج سعود يقول...

انا الي اعرفه انه يشتغل بالديوان الاميري و والده كذلك

اعتقد هذا السبب الي خلى ابوه ينفي تعرضه للضرب

بس 72 ساعة ما اعتقد تستاهل كتاب

لو كتيب نفس الي بالمستوصفات ممكن

حسام بن ضرار يقول...

خل يحمد ربه و يحب ايده ويه و ظهر انه ما شاف غوانتناموا الصجي

اصلاً خل يحمد ربه ان اللي صار له صار بالكويت مو بمكان ثاني، جان ما طلع كتاب، إلا
DVDs

هذيان يقول...

بووليد


بفرض مافيه أذن نيابة

يعني ما يقدرون يطلعون أذن نيابة


بشار طموحاته منتفخه كبر القامس

عيب يا جيفارا

راعي تنكر يقول...

يا بعدي
هذا الكلام الصحيح

الصايغ والقامس ما قالوا رايهم بقضية معينة وعلى اساسه انسحبوا امن الدولة بقضية حرية تعبير
وتالي يطلعون ويقولون انتصرنا

انزين سؤال المليون
العجمي وينهم عنه؟؟؟؟؟؟؟؟؟؟؟؟

As YoU LiKE يقول...

جم سعر الكتاب ؟

انا بسوي كتاب "ملاكي" .. طبعاً راح ينجح بكافة المقاييس من غير دعاية او اعلان !

Q80-ChillGirl يقول...

ما اقول الا

http://aljarida.com/aljarida/Article.aspx?id=20524

:)

و كلنا عيال قريه و كلن يعرف اخيه و ندري شنو اللي صار :) يعني لا يقنعني احد انه ما يعرف احد بامن الدوله او بالداخليه، او ولد جيرانهم او رفيجه او ولد خال عم ابوه "اللي اهو ممكن يطلع زميله بالدوام" مايعرف شنو اللي صار فعلا!!!! بس الغريب شلون الواحد يخرب تاريخ ديرته؟

يقول ببلوقه في موقع الامه عنده وثائق، خلنا نشوف

بس و الله صعبه اقول عن ديرتي كلمه شينه! و المشكله ابوي يقول العكس

:/

منطق شنو هذه؟؟؟؟؟

Unknown يقول...

أسألتك مشروعة بعدم رفعه قضية ولكن يا بووليد أنا أتوقع أن الموضوع بصراحة ما يستاهل كتاب ولا الكويت تساهل هالعنوان ولكن انت صج شدراك ؟

Amphibious يقول...

ياخوي انا مادري عن ال72 ساعة وشصار فيها لكن
يسويلها كتاب!!!!؟
ويشبها بغوانتانامو؟؟

انا اعرف واحد الله هداه اللحين كان رايح يجاهد بافغانستان مسكين قصوا عليه وراح
انسجن بباكستان وطلع راح تايلند وانسجن وخاف يرد الكويت تزوج المانية وراح المانيا وانسجن هناك وطلع ومسكوا بالامارات وعقبها وصل الكويت قعد له يومين بامن الدولة طلع يقول طيبين اوي :)

والحبيب يقول غوانتنامو الغلط مو منه من الناس اللي وراه

Miss-Q8 يقول...

الكويت أكبر من جذي .. و أكبر من كتاب يصدره شخص واحد , و للأسف هو أحد أبناءها ..

يعطيك العافية بو منير ,
و على قولة بلوق عمتي .. صاير حكومي :>

..!

~~~

غير معرف يقول...

شتقول يا يبا
الشرهة على اللي يصدقه و يظنه صج كاتب على الطوفة احبج يا كويت

JuVeNTiNa يقول...

هالاشكال اهي اللي مخربه علينا و رادتنا لي ورا ..

في امه خير خل يقعد في غوانتانامو 15 دقيقه ..

يـا سـْديـَره يقول...
أزال المؤلف هذا التعليق.
يـا سْـديـرَه يقول...

:(

هني المحك هني الفرق بين وطنية النظرية والهذرة الزايدة وبين وطنية التطبيق الفعلي

اتصدق اغلبنا ما عنده ذاك الحس اللي يعرف فيه متى يتكلم ومتى ينطم
excuse my language
لأن لاعت جبدي من هاللي يظهولون
اللي صار عليه ما يستاهل كتاب ولا حتى كتيب !! عنده شي يرفع قضية حتى يحاسب المخطيء
ما اعتقد احد يلعي ليل نهار بالوطنية وتالي يشبه ديرته بغوانتانامو اشلون ياته الجرأة ؟؟انا ما اشره عليه كثر ما اشره على اللي ورا سالفة هالكتاب وسانده !!اشمعنى هالأيام ؟؟ صارله تقريبا سنة توه يصحى يعني والا شنو ؟؟ والا تصفية حسابات ؟؟ والا ايه العباره؟؟

بسنا عاد مزايدات على حساب الكويت وسمعتها

انا ما اقول لج الله يا كويت بلاج من اعيالج

محـــــارة يقول...

حلوه الحكومة الإصلاحيه اولا أسمحلي أنا ماني مقتنعه بشيء من وراء هالحكومه خلنا نرد على محور حديثنا ابرك

بسالفة الأخ بشار أنا كنت ضد اعتقاله بالصوره المنرفزه لكن سالفة تأليف كتاب وباسم غونتانامو الكويت اهني أقولك الأفضل مثل ماكنا معاك نعترض على المسمى

أحنا محنا ضد الدوله ولا الحكومه طلو الخط الي له حق ونرضاه كونا مقتنعين بالحريه نهج لنا إذا مثل ماقبلنا سحب بشار بالصورة المستفزه مانقبل أن تسمى النيابة والشرطه بغونتانامو لسبب بسيط لو اهما غونتانامو جان ماقدرت تنسدح ابيتكتم وتالف كتاب بغضون اقل من سنه والأهم من هذا ما اعتقد الأحداث والموضوع يستدعي كتاب

على جذي المذيع والإعلامي الكويتي أحمد العيدان الي انضم لقناة العربية المفروض شيألف بالله سلسلة مثلا !!! بس طبيعي إذا أنت اتخذت الصحافة مهنه كل فلازم بيكون مسألة وتحقيق أكو دول تخليك ماتشوف الشمس

خلونا نؤمن ونحمد ربنا أحنا شنو عندنا بديرتنا الحريه افضل مانتغنى فيه خلونا نكون منصفين

وتبقى الكويت ديرتنا ومالنا غنى عنها وفوق رأسنا وبعون الله ماعندنا غونتانامو ولاغيرها

صبا يقول...

خل يحمد ربه ان بالكويت مو بديره ثانيه ولا جان اعلوم وكيميا وفيزيا


اشدعوه عليه كتاب !!!!!!!!

ليكون في جزء ثاني بعد؟؟؟؟؟؟؟؟
يخرب بيته لو في خير ما يشوه سمعة ديرتنا الله لا يوفقه لو في
غوانتانامو جان طق اصبع

بعد قلبي الكويت
تحياتي

bo rashed يقول...

صفحات بيضاء
كان فيها نايم ولا حلمان
انزين تهقا ما في جم
صفحه صفره
وجم صفحه مدوعمه
هههههههههههه
يعني معقوله مارح ال
W C
بو وليد القرين هاوس
تقول شفيكم على بوزند وبوقمسه
ماتدري ان سالفة الوطن صارت
نفس قصةليلى والذيب
:p

انا شخصيا متعاطف مع بوقمسه
يعني آدمي هالمتن بروحه يبيله
ثلاث مجلدات مو كتاب

ما قول غير
المصديه والطخه والقرين الهاوس تعرفني

وساحة عبدان تخط على زندي بالقلمي

يا غغغغغغغغغغغلمي
:p

صبا يقول...

مبروووووووووك ما ياك

يتربي بعزك ويخليه حق امه انشالله
الفال حق العزوبي العود بوراشد

متي العشا

؛))

شقران يقول...

العزيز انتر كويت

بدايةً

ألف ألف مبروك على المولود الجديد يابو الوليد...وربي يفرحك فيه وباخوانه وتشوف عيالهم وتفرح فيهم



---------

بالنسبة للموضوع

فنحن في زمن البطولات الورقية


ولآ بذمتك..فيه أحد يقعد بالتحقيق يومين وبعدها يألف كتاب!!!؟؟


عجبي


مع وافر الاحترام وصادق المودة

بـنـت بـطنـهـا يقول...

شوف ياخوي خل اكلمك بصراحة ولو ان ما عندي خلفية كبيرة عن الموضوع واللي سمعته وقريته ما يتعدى اللي انقال بالانترنت ولو ان طريقة اعتقاله كانت شي مستفز لنا جميعا لكن
انا معاك ان التسمية جايدة ومعاك بعد ان هالكتاب راح يصير حالة حال مسلسلات رمضان اللي مفشلتنا عند الكل
بس لو يتوزع محليا ومنع صدوره للخارج جان زين عشان عشان الواحد يفكر ألف مرة قبل لا يقط الكلمة
وبكل الأحوال انا اشوف ان اللي صار حق بشار الصايغ شي يديد علينا ولا تعودنا عليه
يحق له يكتب عن تجربته
ويحق لنا نختار اللي نقراه

بـنـت بـطنـهـا يقول...

مبروك ما ياك
ويتربى بعزك يا رب :)

ولد الديرة يقول...

اول شيء ترى انا مريض :p

الصورة شغل عدل ولا بو قمسة يهبل فيها

فعلا الكتاب راح يكون من القطع الصغير والا الكبير

انا اقترح يكون صغير علشان يسهل مو بس قراءته

الا يسهل
.......

KQ8 يقول...

ياخي انا ماني عارف شقصة التحالف..مو متوفقين بشي..من جرف الى دحديره

لا من المرشحين لا من اعضاء لا من قضايا تتبنى..

عين عين ماصلت على النبي

:)

ZwaiZ يقول...

ya3ni al7een 3awaratkoum kilmat Guantanamo?

kuwaitforus يقول...

عسى ماشر ياجماعة شفيكم
وليش المبالغة
التحالف يحبون يقرون كتب
وأنتوا ليش معورين راسكم
وين حرية الراي أفا بس أفا

Faisal يقول...

انت ظد الحرية الشخصيه
بس ماراح اكتب زياده
:P
لا يكون الكتاب ينباع بالكويت بعد ؟

يعني مسكين هالادمي الله يهديه قاموا له ناس والديره وحاله على بو انه مظلوم مسكين اخر شي طلع خارب الدنيا وماس مو بس الدستور ماس الذات الاميرية شخص بمنتداه
الحبيب عباله بطل قومي والمدافع عن الكلمه وحريةا لرأي !

اخوي حاكي ليش في ناس عايشه انه ماعندنا حرية رأي وحرية التعبير ؟
انت تشوف انه ماعندنا ؟

someone_q8 يقول...

السلام عليكم

ما اقول الا الله يهديه
الاخ قعد 72 ساعة وامسوي كتاب عيل نلسون مانديلا شنو راح يكتب مجلدات ؟؟
شالمصاخة الزايدة

ناخب بالدائرة الثالثة يقول...

http://independent-kuwaiti.blogspot.com/

نفس موضوعي
يعطيك العافية

موظف حكومة يقول...

العم حاكى عقالى

اولا
ما ادرى شالسالفه بس دام الناس تقول
فنحن خرفان و مع الخيل يا شقرا
" مبروك ما ياك
ويتربى بعزك يا رب "

ثانيا
يومين حجز كتاب
هذا اسهال فكرى

kazmawy يقول...

ههههههههههه
كاااااااااك
لوووووووووول
ابو وليد منو هالبحرينى الى قالج جذى اخاف يقص عليك لوووووووووووول

...شسويت فيهم خليتهم كظماوية قلبا وقالبا..
اكيد راح يقدمون اقتراح تغيير فنيلة نادى كاظمة بعد

ابوالوليد يقول...

ياجماعة لوصج تعرض للتعذيب مايتجرأ ويتكلم ويشوه سمعة من يقوم بعمله بأمن الدولة

ولوصج كلامه كان تلوه مره ثانية وقرصوه على زنده الثاني








بس زقرت الدشداشة والغترة البرتقالية
:)

يبيلنا وحدة حق العيد

كويــتي لايــعه كبــده يقول...

له الحق ان يذكر ما حدث له بالطريقة التي تعجبة (كتاب، نقش على الجدار، مشتخته، الخ) -الله يعلم اني لكنت أعمل أكثر لو كنت في مكانه- لكن اذا هو "وطني" مثل ما يدعي فليرفع الربط بين "غوانتانامو" و"الكويت" والإساءة المقصوده

---
مبروك اللافي يا بو وليد
يتربا بعزك ويبلغك فيه

دريت من تعليقات الشباب
سامحني من القصور

---
ولد الديره...
"سلامات يا الغالي سلامات"
تعرف الأغنية البدوية؟
:)

---
يا سْديرَه...
"لأن ×لاعت جبدي× من هاللي يظهولون"

احترمي الحقوق الفكرية يا اختي
:)

molok يقول...

اول شي مبروك المولود الجديد ..

ثاني شي .. شافوا ان عندنا امكانيات اعلامية تطلعنا ابطال.. ليش مانستغلها .. بس مافكروا ان في ناس عندها عقل وراح تفكر بكلامهم اللي قالوه ..

مشكور وايد .. وعسى الله يوفقك ..

العرزالــــــه يقول...

هلا بالسمي

ذبحتني بالصورة

قوي قوي

حبيب قلبي

مبروك ماياك

يتربى بعزك

ويجعله ربي من الذرية الصالحه

ويبلغك بعيال عياله قول امين

:)

LonDonY يقول...

الحمدلله على السلامه، مبروك اللافــي

***

حاكي

كليتوه بقشوره.. عطووو

الولد فجججه يتيدد على روسنا

***

KrakatoA

والله انك صاج
وين ما يطقونها عووويه

وبـ جيفارا التحالف..
انتقض وضوووئهم

. . . ساخر كويتي يقول...

من صجهم مسوين كتاب
لا يكون سيرة غاندي
او نيلسون مانديلا الكويت

فعلا احنا يا الكويتيين اذا بنكبر الموضوع نعرف شلون نخليه كبر قارة اسيا ،، حتى لو كان أتفه التوافه

يعني حتى لو كانت الحكومة وامن الدولة غلطانين وهم دايما يغلطون على فكرة خخخخخ
مسوين الشباب الموضوع ذكرى سنوية يا معودين من صجكم انتوا ...

خليها على الله
تحياتي بووليد

غير معرف يقول...

بعيدا عن القرصه والكتاب الي حصل لهم غلط طريقة الاختطاف من الشارع غلط كان ممكن يتم استدعائهم بطريقه حضاريه واذا مالبوا الاستدعاء ذيج الساعه يتم الاعتقال وهناك سوالف كثيره سمعناها عن امن الدوله ولم يتم تكذيب اي سالفه منها من قبل هذا الجهاز عن تعذيب وغيره ولا تنسى الارهابي الي صادوه بالقرين ومات داخل امن الدوله من التعذيب ولا قدرنا نحصل منه ولا معلومه بسبب غباء اعضاء هذا الجهاز
------------
اما عن الكتاب فله الحق ان يؤلف كتاب يسميه غوانتنامو الكويت ولك الحق ان تؤلف كتاب آخر تسميه الكويت المدينه الفاضله من غير لا احد يجرحك ويجرحه ومن غير اسلوب السخريه هذا
:)

ولد الديرة يقول...

مبروك ما ياك

:)

violinist_q8 يقول...

مبروك على ماجاك :)
يتربى بعزك

Fskra يقول...

3jbtni moqdmt el mqaal :P

le2naah eli 9ayer enaa el kil
al7een gam .... :P

5osh post teslm anamlik

enter-q8 يقول...

مبارك عليكم الشهر و عساكم على القوة
و اسف للتاخر بالرد

محمد اليتامى يقول...

أول شي

مبارك عليك الشهر مقدماً

و ثاني شي

مبروووووووووك ما ياك

يتربي بعزك ويخليه حق امه ان شالله


و ثالث شي

على قولة بوصالح اب درب الزلق لما قال حق سعد

تركة ، تركة عنك خل يولي


تحياتي

وسيشهد يقول...

الموضوع اخذ اكبر من حجمه

في البداية كلنا وقفنا ضد عملية الاعتقال و طريقتها

ثانيا ما اتوقع إنه احد اطلع على الكتاب لانه ببساطه ما نزل ليلحين

ثالثا ما اتوقع إنه احد كان معاهم و شاف شصار لهم عشان يفتي و يقول شدعوه يكتبون ماصار لهم شي! شدراكم ماصار لهم شي ؟

رابعا ما اتوقع انه احد مجبر انه يقرى الكتاب اذا نزل ولكن الدعاية اللي صارت له من المؤيدين و المعارضين للكتاب بتخلي الناس تروح له اول ما ينزل يعني دعاية ابلاش

خامسا حرية الكتابة و النشر مكفولة بالدستور و اللي مو عاجبه عنوان الكتاب خل ينزل كتاب يحط عنوان مثلا الكويت مو غوانتانامو او يحط اسمه الكويت جنة!

سادسا ليش الكل قاعد يشوف النص الفاضي من القلاص :) شوفوا النص المتروس ،، يعني ليش بنظرتكم انه كلمة غوانتاناموا تسيء للكويت ؟!! عندنا ماشاء الله ""بعض"" النواب حرامية ما يشوهون سمعة الكويت ؟ عندنا نواب تدعوا لفزعة عيال عمه حق ولد عمهم الوزير ما شوهوا صورة الكويت ؟ عندنا ناس اتطق عناصر الامن و تعتدي عليهم و بعدين تقول ما سوينا شي و يغنون وحده وحده وطنية نعم نعم للفرعية !! ما شوهوا صورة الكويت ؟؟ عندنا ناس باقت الكويت في الغزو و حطوا لهم جريدة و تلفزيون و كل موظفينهم كويتيين و يتكلمون عن الوطنية بعد اذا مو عاجبك ! ما شوهوا صورة الكويت ؟؟ عندنا نواب يكفرون و يسبون اي فكر ما يعجبهم ! ما شوهوا صورة الكويت ؟ عندنا قناة مسوية الكويت ملطشه للعالم جنه كل الكويت ميتين يوع و مسجونين ماشوهوا صورة الكويت ؟ عندنا ناس تمنع كشاكيل عليها صور ممثلين لانها تحرض على الغرائز و منعها يزيد من نسبة التحصيل العلمي ،، ما شوهوا صورة الكويت ؟ لما العالم يقرى و يشوف تصاريح نوابنا و يشوف عقلياتهم و يعرف إنه هذيل وصلوهم المواطنين و يمثلونهم ماراح يقول إن كل الكويت جذي؟

خلصت مشاكلنا و صارت كلمة غوانتانامو اهي اللي تشوه صورة الكويت !!

Kuwait يقول...

مبرووووووووك ما ياااااااك وسوري على التأخير :)
أما غوانتنامو الكويت إن شاء الله يجربونه بعد ما ينزلون الكتاب ;p

Q80-ChillGirl يقول...

اخوي خالد اسمح لي باللقافه

اخواني: حمودي و الصقر

صحيح له الحق و الحريه بانه يقول اللي يقوله بس ترى ماشرهنا عليه و تكلمنا بهالحدة الا اننا نحن المدونون و النشر الالكتروني المعني الاكبر بالموضوع، البروباجاندا التي لفت موضوع بشار جعلتنا نقع تحت المحك و ندافع عنه بشراسه و لما سألنا يمين و يسار و عرفنا الصج كلينا طراق محترم لان الحقائق ماكانت كامله

و ماراح اكثر بالحجي عن اللي اعرفه بس بقولكم، لو كلامه صحيح و اللي يقوله انه حق، فاين الدلائل؟ و ليش ابوه يقول هالكلام بالصحافه؟
http://aljarida.com/aljarida/Article.aspx?id=20524

و بنفس المنبر اللي يتكلم منه ولده بشار تكلم الابو

و ليش صمت جاسم القامس؟
و ليش الحين بشار فتح الموضوع؟

سلمك الله يالصقر البواق لي باق نقول ماعليه شرهه و نحاربه، بس حربنا و شرهتنا على اللي نشوفه منا و فينا اكبر

و بيدنا و جدامنا كل الحقائق، ليش ما نعترض و بصوت عالي؟
عسى يصحى فينا الصوت و يطلع جيل لي شاف الغلط يوقف بحزتها و يقول للغلطان بعينه انت غلطان، و اذا ما كنت غلطان اثبت لي هالشي

قد لا اعبر عن نفسي بنفس طريقة اخوي انتركويت، لكني اقف معه بنقطة اني ارفض ان يشوه صورة الكويت احد ابنائها و من يعمل في السلك الاعلامي بدون ادله و براهين، و شنو المانع من انه يرفع قضية؟ يطالب بحقوقه لو تم انتهاك احد منها؟؟؟؟؟؟

و بجذيه يحط الحقائق بعيونا و جدامنا، و ذيج الساعه خل نشوف من يلومه

التشويه مو بس لصورة البلد، التشويه بعد لتاريخ هالبلد: هذا اعلام - هذا كتاب و ثقافة!!، و لا ننحرف لغيره من المواضيع التي لا تقل اهميه عنه بل يمكن تزيد عنه، بس مثل ما قلت فوق اللي خلانا نشد بهالموضوع اننا بوسطه و فيه و عايشناه بكل تفاصيله

غير معرف يقول...

Q80-Chill Girl
انا اتفق معاج بالي قلتيه تعم لماذا لم يرفع قضيه ولماذا قالوا ان المعامله جيده وبعدين تراجعوا

لكن
مو من حق اي احد يمنعه من تاليف الكتاب كما اني لا اؤمن بسمعة الدوله فهذه دوله لها تاريخها ولا يؤثر فيها كتاب او غيره اذا خل يئلف الي يبيه ولكم حق النقد من غير تجريح

Q80-ChillGirl يقول...

حمودي

على الرغم من قلة المهتمين في الكتب بعصر سهولة تناقل المعلومات و عرضها الاسهل خلال الوسائل الاعلاميه المختلفه من حولنا الا ان الكتب بالنسبة لي تتكلم و تخط مسار دوله، فإن وجد كتاب يعكس صورة غير مشرقة عن دولة ما فانه سيدفعني للتساؤول على اقل قدر، و سيحثني على القيام بقراءة كتب مع و ضد و عمل بحث للمقارنة بينهم للوصول لقناعه و حقيقة هذه الدولج او تلك الحادثه

انت لاتراه مؤثرا و لي حقي بان اراه عكس ذلك خاصة اني حتى الان لم ارى الحقائق، و الكتاب جزء من ثقافة الشعب و بهذا انا لا اشير الى كاتب بل الى كل من يكتب في هذه البلد وفي هذا الوقت المعاصر

يمكن تعتبره كتاب و عابر، عنوان و لا يهز صورة بلد

بس انا اقول امبلا و هذا رأيي، و اقوله قبل لا يألف خاصة بانه موضوعه بمدونته في موقع الامة يوعدنا بالدسم و التفاصيل، اولم يتناهش المستنفذون و ذوي السلطه هذا البلد بشكل كاف لكي يجعلنا نداريها منا قبل لا نداريها من غيرنا؟

بالنسبة للتجريح او الاسلوب، فلست بصدد ان افسر كلام اي احد غيري ولكل كاتب اسلوبه و لكل قارئ الحق بان ينتقد لانه قرء ما كتب
:)

غير معرف يقول...

الحكم على الكتاب مبكر جدا الان ننتظر نزوله ونقرا الاحداث وعندها نحكم ان كان ما حصل يستحق هذا الاسم ام لا او ان كانت الاحداث حقيقه او سيتم تكذيبها من جهاز امن الدوله
---------
كيف سيأثر الكتاب على صوره الكويت واحداث سنة المجلس والقتل والسجن الذي حدث وهروب الناس الي العراق والسعوديه خوفا من بطش السلطه لم تشوه صورة الكويت خاصه ونحن في منطقه تعتبر غوانتنامو جنه مقارنه بما يحصل بباقي الدول

enter-q8 يقول...

أنا أعتذر من الاخوة المعلقيين اني ما رديت عليهم و لكن ان كانت النقطة الاساسية اجتمعنا عليها فالمقال يعتبر رد و كذلك انني اقوم بالتجاوب مع المعلقيين بمدوناتهم
أسمحوا لي ان أتطرق الى الردود التي ضد الموضوع او المقاله التي طرحتها

الاخ الصقر

اسردت كلامك و قلت
خامسا حرية الكتابة و النشر مكفولة بالدستور و اللي مو عاجبه عنوان الكتاب خل ينزل كتاب يحط عنوان مثلا الكويت مو غوانتانامو او يحط اسمه الكويت جنة!

يا سيد ما نزلنا كتاب نزلنا مقاله و اثارت تحفظاتكم انتم
لو بنزل كتاب شنو بيصير

اما المساوئ الثانية التي تحدث ببلدنا العزيز فقد تطرقنا اليها
يعني انا مو فاتح معرف و اكاونت بس علشان ارد على بشار اللي اعرفه قبل التدوين هذي معلومه يمكن ما يعرفها احد، ثانيا و اخيرا هل قرصه على الزند تسوي فيها كتاب اسمه غوانتاناموا و تقول انها تعذيب بل الامر الادهى انكم ادعيتم انها تحت طائل الدفاع عن الحريات
ارجع لقراءة المقال مرة اخرى
و ستعرف سبب تطرقي و اود ان انبهك ان كل المدونيين كتبوا عن المساوئ التي تحدث ولكن لاحظ الفرق لم يقل احد فيهم ان الكويت جوانتاناموا او يلصق بها اسم قذر
هناك فرق

اما اخونا العزيز

حمودي


حرام عليك يا رجل هل تقارن ذيك الفترة بهذه
يا اخي خلك عقلاني
و حقاني تريد ان تقارن حقبة تلك الرجال بسجن يوميين و ماكوا اي وجهه للمقارنة او التعذيب

لايكون سووى ببشار نفس ما سووى بالمنيس
اقول احترم تاريخ اولائك الرجال و لا تقارنهم بشغل مصبنة
و اكل وجبات من هارديز
عيب عليك
و هذا انتقاص من حقهم لما تحط هالمقارنة
عيب جدا طرح يا حمودي و انت تعرفني صريح وصديقك من صدقك ماني مجامل و قناعتي اقولها لك بوجهك ما اقولها من وراك الحقبة التي تتكلم عنها لم يكن هناك ايامها دستور و قانون و الحقبة التي تتكلم عنها لها رجال مع احترامي لا نسوى ظفر ريلهم باعمالنا حتى تقارننا فيهم
بل حتى رجال تلك الفئة لم يهاجموا الكويت اكثر ماهاجموا النظام
في فرق في فرق
ولا تخلطون
ترى الخلط مو زين بكل شي الخلط مو زين

مبارك عليكم الشهر مره ثانية

KQ8 يقول...

عفو مداخله بسيطه

لم يحدث مايسمى بـ ( الاختطاف ) فكلمة الإختطاف كملة نسجت من مخيلتهم...هناك امر بالقبض على بشار نتيجة لقيام شخص على موقعه بذم الذات الأميرية هذا هو سبب القبض عليه كونه صاحب الموقع ولديه الإمكانية والإطلاع على اراقم الاي بي الخاصة بالمشتركين..والإفاده عن رقم الشخص الذي انتهك الذات الأميرية..!!

وهو امر كما تعلمون..دستوري ( حيث ان الذات الأميرية مصانه )

لم يقبض على بشار بسبب رأي قاله او بسبب موقف او بسبب منشور او بسبب امر سياسي خاص في السيد الصايغ وحده..بل قبض عليه بسبب عمل اقترفه شخص اخر في موقع يملكه السيد الصايغ وتحت ادارته فقط لاغير..!!!

بشار لم يعامل معاملة سيئة ابدا..بالعكس كان متعاونا الى ابعد الحدود مع افراد المباحث..واشادو بتعاونه انفسهم..فلا نألف سوالف مالها داعي علشان نصدق جذبه كلنا عشناها للاسف وفرشت على ادمغتنا..!!

من يقول ان السيد الصايغ عُذب او حتى ( تطورق) عليه ان يثبت هذا والبينه على من ادعى وهذا الميدان يا حميدان نريد اثبات فعلا ان السيد الصايغ عُذب او عومل معاملة سيئة تستدعي ان يتنمطق بمنطق تأليف كتاب يدعي فيه ان الكويت غوانتنامو..!!!

نعم نحن لسنا مدينة فاضلة لكننا لسنا ايضا مدينة سوء لسنا سوريا او العراق او ايران او مصر او اي من الدول القمعية...لنتكلم بالعقل والمنطق..وراعو عقولنا ..!!

شهالمصاخه....!!

غير معرف يقول...

Enter-Q8
انت قريت تعليقي في الاول ؟
انا لم اقارن انا فقط قلت ان الي حصل في تلك الفتره لم يشوه صوره الكويت فكيف سيشوهها ماحصل لبشار ؟

ثاني شي انا ماغلطت عشان تقولي عيب انا فقط قلت ان ننتظر الكتاب وما به من احداث وذيج الساعه نقرر ان كان يستاهل الاسم او لا او ان كانت الاحداث الي فيه صحيحه او سوف يتم تكذيبها من قبل جهاز امن الدوله لكن حضرتك تريد ان تحكم على الكتاب من الان و باسلوب طنازه ومن ينتقدك تقول له عيب

enter-q8 يقول...

حمودي على ما اظن انا واضح و كلامي واضح
انت اللي اسردت الحادثه و قلت انها لم تشوه الصورة كمقارنة
يعني انت اللي حطيت المقارنة

وانا قلت لك
اين الثرى من الثريا و الاحداث هذيك غير و بزمن غير
يعني ما في مجال للمقارنة او ذكرها كحادثه مشابهه
و انت قلت لا اؤمن بسالفة تشوية الصورة

و ارجع واقولك ارجع للمقال
ما عندي اي اعتراض على كتابه
ولكن الاسم يحق لي اني اعترض و اقول راي
خصوصا ان اسم الكويت
لو كاتب يوميات بشار ماعندي مشكله
و شيئ شخصي و لا يحق لي الاعتراض
اما زج اسم وطن فا معليش لي الحق كاكويتي

و راجع و اقولك اقرء المقال
و الاسباب التي تدعو الى الاستفهام
وينهم طول هالمده
و الا اهو دفاع و بس
و اما اسلوب التطنز
انت عارفني
و عارف اسلوبي
اني للحين ما اتطنزت
ولو ابي اتطنز ما اقول عيب
عندي من الكلمات اللي اقدر احورها و اخليها تخدم نفس المعنى و باسلوب الطنازة كما ذكرت
انت اللي زججت بهذه الحادثه من باب المقارنة
و حكاية التشوية للكويت

Blog 3amty يقول...

مبارك عليك الشهر .. ومبروك اللافي :)

وسيشهد يقول...

عمي انا مؤمن انه من حقك و من حق غيرك الكتابة بأي موضوع لانها بالنهاية هذي مدونه يعني افكار تحب تشاركها مع غيرك

أنا القصد من ردي كان مجرد وجهة نظر شخصية
أنا لا ما اتوقع انه تاريخ دولة كامل راح يتشوه في عنوان كتاب و انا ذكرت عدة شغلات موجودة و كل يوم نشوفها تعتبر اساءة للكويت من وجهة نظري

و يمكن تذكرون كتاب الدكتور احمد الخطيب
و منع و قالوا هذا الكتاب يهدم القيم اللي قامت عليها الكويت و هذا الكتاب يشوه صورة الكويت و غيرها و ظل حبيس الادراج سنين و لما سمح بنشره لقينا انه كتاب مافيه اي شي و عادي مجرد كتاب فيه معلومات تاريخية

يعني الحين احنا مشتطين على سالفة غوانتانامو و ما ندري يمكن يمنع من النشر

لانه إحنا دولة تتفن بجميع أنواع المنع
يعني منع كتب منع افلام منع الكلام منع التصوير بكل مكان ليش تسمحون ابيع الكامرات عيل ؟
منع أنواع من الملابس ، منع الهدايا ، منع الصور ، منع عمل الرجال في محلات النساء ، منع النساء من العمل ، منع قوات الداخلية من مداهمة الفرعيات :) منع عرض ملابس داخلية و إن شاء الله منع كتاب غوانتانامو الكويت !

يعني شي طبيعي

و أكرر ترى كانت وجهة نظر مثلها مثل باجي وجهات النظر اللي سبقتني

دمتم بود

enter-q8 يقول...

اخوي الصقر
انت قلت حرية راي و شخصية
و قلنا راينا
ولكن الاعتراض منكم ان ما قرينا الكتاب و على كلمة غوانتاناموا
يا استاذي
تكفى اقرئ المقاله
اعتراض على كلمة في غير موقعها
و اكرر و مذكور في المقال انني لست ضد نشر يومياته ان كانت صادقه او كاذبه او حتى تمجيد بنفسه
ماهمني
اللي همني كلمة غوانتاناموا
و ارجوا منك و من كل القراء عدم ضرب امثله برموز لأن اين الثرى من الثريا يا اخوان
أحمد الخطيب مذكراته شنو عنوانها
العدساني و الحاتم ووو كلهم
لم يزجوا شيئا على اسم الكويت
كانوا مع النظام
هنا الفرق ياخوي
عندما تذكر غوانتاناموا شنو الصورة اللي راح تتراوالك او تنقز بويهك
هذا اهو القصد
ولما نتكلم ليش و نعتب
لأن الشيئ هذا الكل شارك فيه على حسب ان كان حرية الكلمة و الراي و بسببهم صار اعتقال بشار و العكس صحيح
مو محتاج الشرح مره ثانية

همسة
بذمتك كل واحد الف كتاب و حط في ادعائات بقوم انفي و اصرح
السؤال الاهم
وينه طول هالمده
ترى نتكلم عن سنة مو شهر و الا شهرين و الا عشر

و فوق هذا بس تروح المستشفى تقولهم ابي تقرير طبي بعد خروجك
اثبات حاله كافي و وافي
و ايضا وين رفع القضية

عرفت اخوي الصقر
لما تنفي هالاسباب نقدر نتكلم بفحوى الكتاب و مصداقيته
اما غوانتاناموا فهذا مو راي شخصي لشخص معيين
لأن الاسم المرادف اهو وطــننا
فلنا الحق ان نعترض و نعقب
و لصاحب الكتاب ان يأخذ بالراي او يتركه
السالفه اذا رائيت اننا مشتطين فيها
فهذا لأن اسم الكويت فيها
و على سالفة سجن يوميين
اما الخطيب
لما نشر مذكراته
كان رمز و من المجلس التاسيسي و من القوى الوطنية
يعني لا مجال للمقارنة
و ايضا كان ضد رموز و اسماء و ليس الكويت

بنت الشاميه يقول...

مبارك عليك الشهر وعساك من عواده
زكل عام وانت بخير

Unknown يقول...

بو وليد غير الموضوع وخلصنا من هالسالفة يا معود

هذيان يقول...

كل عام وانت بالف خير

مبارك عليك وعلى الاهل كلهم الشهر

حسام بن ضرار يقول...

مبارك عليك الشهر و كل عام و انت و العائلة الكريمه بألف خير

LiL ALiEN يقول...

مبارك عليك الشهر .. وعساك من عواده

غير معرف يقول...

مبارك عليكم الشهر
:)