05‏/11‏/2009

فيصل الكافر و فيصل المسلم و المطافيق


تخيل معاي عزيزي القارئ لما تقعد مع واحد اسمه محمد يعني محمد اكيد انسان من اسمه مسلم موحد بالله و رسوله هذا ما يفرضه الواقع و المنطق و العقل و يأذن الاذان الله اكبر، وانت قاعد مع محمد تلاقي محمد يردد الاذان هل هذا تصرف غريب او عجيب او مستنكر
تصدقون و تأمنون بالله (عودك رنان) استغرب ان محمد يردد الاذان و كأنه مستكثر على محمد اللي ابوه و اخوانه و عيال عمه و عياله وبيته كلهم مسلمين ان يردد الاذان
الصراحة بعد مقالة (عودك رنان) بديت اشك اننا كفره و لازم (عودك رنان) و حارس جريدة العوية وتيارها كله يدور على اهل الكويت وقت الاذان حسب المذهبين السني و الشيعي و التوقيت المحلي علشان يتأكد انهم مسلمين هذه المقدمة فقط لمقالة غريبة واول مره تنطرح نوعيتها بجرائد الكويت نوع جديد من العجاف اكسروا حرف الجيم


استريحوا لا تراهنون على ورقة النسيان


فيصل الكافر الذي كفر باستفساره عن معلومات كانت لديه العام الماضي عن مبالغ خرجت من عند سمو رئيس مجلس الوزراء الى اعضاء بالسلطة التشريعية الرقابية اكرر الرقابية التي تراقب اعمال سلطته التي يرئسها و بمبالغ ضخمه و التي انكرها ديوان سموه و اللي سموه رفع قضية على فيصل بعد خمسين يوم من حل المجلس لاحظوا بعد خمسين يوم، تهارعت عليه و انهالت التصريحات مره يمكن يبي يشتري سموه جاخور من نائب مره سموه عنده تجاره مع نائب مره عمل خير بمتين الف مع نائب و كله كوم و مصروفاته كوم اللي فقط حصرها تقرير ديوان المحاسبة بثمانية و اربعين صفحة

بمخالفات واضحة
و سجل يا تاريخ لا من الديوان و لا من سموه


العجيب و المستغرب ان محد تكلم عن تاريخ الشيك اللي يثير فعلا الف تساؤل لكن نرجع مره ثانية لنواب الطفاقه المطفوق او المطفوقه عندنا بالكويت يندرج تحت هاللقب الف فعل او معنى تقدر تقول مطفوق ملقوف متسرع غشيم دفش كل شي راكب عليه يا سبحان الله
وهم يا سبحان الله ما ادري ليش تذكرت النائبة رولا دشتي اللي سيده صرحت عالطول و بدون نقاش لا فض فاهه


فليقدم النائب المسلم استجوابة لرئيس الوزراء و سنتصدى كلنا له
مو زين يا ست رولا اعرفي شنو الاستجواب و شنو محاوره ليش اللقافه الركاده زينه يعني بالله زلقتي و طحتي علي كيكه بهالحفله
مو زين التسرع و الدفاشه اذا وزير الدولة قال اذا ثبت ان الشيك رشوة اول واحد بيوقف معاك واللي على فكرة رد عليه فيصل و قال لم اقل رشوة
وجهة نظري بسيطة جدا ليصعد سموه و يبرز الشيك الاصلي و يقول حق فيصل يالله يا انك كافر يانك مسلم بس هالمره بدون شهادة عودك رنان ليصعد سموه و يبرز الشيك الاصلي
و يقوله
مو شغلك مصروفاتي الشخصية( ما اظن يقولها ) لأن السالفه شكلها فيها اكثر من نائب
او
عطيه ما وراها جزيه لشخص يراقبني
او
عانية عرس مع ان اغلب العروس يقولون نعتذر عن قبول العانية
او
يبرز صورة عقد شراء الجاخور اللي قال عنه الروضان
اما فيصل ليش ما طلعها قبل و طلعها اللحين وووو نقول يوبا بلاها لغوة اللحين احنا امام امر واقع ولا احد يقدر ينهي هالجدل الا سموه

و ديروا بالكم

تظلمون احد يا اخوان

اخيراً
عذر اقبح من ذنب

نعم عذر اقبح من ذنب ما يتداوله بعض النواب اللي ما ادري يمثلون الامة و الا اللمه لما يقولون الاسئله البرلمانية و الاستجوابات تعطل الحكومة والوزراء ،الله لايهينكم احنا شعب كلنا هالكبيرنا مو وايد و اكيد نعرف احد بديوان الخدمة المدنية سالوهم كم عدد الاستشاريين بمجلس الوزراء و بمكاتب الوزراء غير المكاتب الفنية غير المكاتب اللي بالمؤسسات الحكومية اللي تخصصها الرد على اسئلة المجلس بس هالسؤال البسيط و من اللحين لا احد يخترع من الرقم


و ابتدى المشوار


إرسال تعليق