تحديث-هلال رمضان قبل و الا هلال الساير قبل

شبو شبه على الاعضاء و اتهموهم بكل شي صحيح من هالاعضاء اللي له مصلحة شخصية و لكن الواقع غير يا جماعة اعلى دولة خليجية بالاصابة احنا و عالفكرة ترى بعد تصريحات الاعضاء و تساؤلاتهم اللي رد عليها الدكتور هلال الساير بانهم اشفهمهم لولا هالربكه و هالصيحة و هالتصاريح ركزوا معاي و قولولي اذا انا غلطان
ما شفنا النشرات الطبية اللي بالمسجات ما شفنا التحذيرات
ما شفنا المختبرات اللي انفتحت ما شفنا دوام صبح و ليل و اضافي
ما شفنا اسعار الديتول ارتفعت
ما شفنا بعض المؤسسات و الجهات اللي قامت تصير حريصة
ما شفنا الخطر الحقيقي اللي كنا مقبلين عليه
بين ان انفلونزا الخنازير تموت و الا ما تموت واذا ما تموت ليش هالخوف طبعا طل، لأنك لو بتقعد مع اي دكتور و تقوله مدام انها ما تموت كثر الانفلونزا العادية تموت خلاص ماله داعي خل الامور تمشي و سهالات، و لو نلاحظ سالفة الشماعه مالت الانفلونزا العادية انها تموت اكثر من انفلونزا الخنازير عمركم سمعتم احد بالكويت مات من الانفلونزا العادية و للعلم اهم اثنين راح ياخذون جائزة نوبل بدون ترشيحات اللي يخترع دواء انفلونزا العادية و علاج السكر عرفتم المغزى ، المغزى ان انفلونزا الخنازير لو صابتك و عبالك انها انفلونزا عادية و بتاخذ مضادات و تدوره ليمون و نعناع و فيكس شخباري فيكس و تنطرها تروح لا يابابا ماكانش يتعز اذا دخلت مرحلة الفراش و التحلف بالبطاطين انت سلامات، لذا يا دكتور هلال لا تلوم النواب و الناس خصوصا انك بوزارة من اسوء الوزارات بالكويت و تفتقد ثقة الكثير و اذا انا غلطان شوف العيادات و المستشفيات اللي كل يوم طالعه و اللي قاعده تنبني و الا اذا وزارة الصحه زينه و خدماتها قوية شكو تزيد هالعيادات و المستشفيات للعلم فقط ان الموجودين بالمطار غير مؤهلين للفحص الطبي الخاص بتفلونزا الخنازير

تحديث

قبل الرد على هذه الفقر ارجوا الاطلاع على موضوع زميلي المدون بنج موضعي مع جزيل الشكر له

الكويت ليست مجرد رقم

*-*-*-*

خوش فيلم

يا جماعه شنو وجه التشابه بين فيلم
Transformers
وبين تصريحات وزير الكهرباء

اثنيناتهم مو صــــــج
كل يوم و ترك منطقه مقطوع عنها الكهربا و يقولك عطل عطل عطل اعرف احد المهندسين يقول اصلا انهم يسوون صيانه قبل الصيف، و غير هذا سالفة المسجات يقول لا فض فاه ان المسجات فقط للترشيد و راح يصير عندنا فايض بالمستقبل القريب، و تسالوني ليش سميت مدونتي حاكي عقالي

*-*-*-*

ابو البيض

توني ادري ياجماعة والسر عندكم بالامان ان عندنا مورد دخل قومي غير البترول اللي مستحوذين عليه قيادات توزع على نفسها بونص بمئات الالوف تقول اهم اللي قاعدين بالشمس مو عيالنا و الا استثماراتنا الخارجية اللي يبون يستثمرونها ببورت غلبان بعد ما كان بورت غالب، لا طال عمركم لا تحاتون فبعد جلسات مطوله و سرية مع تكتيم اعلاني خوفا على هذا الدخل القومي، اللي اكتشفته بالصدفه من خلال خبر صغير سرب الى احد الصدف اهـــو البيـــــض

نعم البيض فقد قامت حكومتنا و بحرصها على الحفاظ على المال و على موادر الدخل القومي بعدم تصديره خارج الكويت، أتعــــب عليه هذي القرارات و الا فـــلا لا لأستنزاف الموارد القومية بتقلون اشفيه الاخ على البيض و اشمعنى دلوقتي او هالساع او هالحــزة اولا لأن سعر البيض المستورد ارخص حتى لو كان جوا اقول حتى المشحون جوا ارخص غير هذا يا ساده يا كرام تجار البيض حلوة تجار البيض يازت للبعض ياخذون دعم و فوق هالدعم بعد غالي و لا معترضين يبون يرفعون السعر يستاهل البيض الوطني القومي يستاهل ابو البيض

*-*-*-*

ابـــي قــهوة

الزميل العزيز متروس قهر مقهور المقهوري اثار موضوع مو طبيعي على اثره قام السعدون و وجه سؤال بهالخصوص و اهو بيع الكويتية لتوكيل كوستا كوفي انا استغربت لأنه يعتبر احد الاصول مالت المؤسسة و اللي ممنوع تنباع الا بعد ما تتخصخص هالكيف يستوي الغش بالتجارة ما ادري لكن اللي عرفته من الزميل العزيز ان من شروط المزايده المطروحه لبيع كوستا مفصله تفصال صح نمت على ظهري و قعدت اطالع سقف البيت و الا يبيله صبغ و هم بعد معجون و هم ديكور جديد وليه وقته اهو مصاريف زايده و تعال غير و حط وسوي عرفت ان هالامر مو بهالصعوبة لدى البعض لذا كانت النتيجه

*-*-*-*

طــار ابو شخه

و اخيرا تكرمون الضبعه مثل ما سماه الوشيحي

الا عالطاري الجريدة اللي يتابعها يتأكد متين في المية من مقولة ان الحريم فعلا يحبون الهذرة خصوصا ابله سلوى و طنط معصومة
وهم بعد ما ادري اشفيهم اشوف كل لقائتهم مع نواب حكوميين زلزله و الخرينج يمكن بعد يومين الخنفور و زنيفر

*-*-*-*

اليوم الاربعاء خالد الفضاله على قناة الشاهد و بنشوف شنو رده على اللي انطرح و ما طرح و ما سوف يطرح و ما سأطرحه بعد المقابلة

خالد الفضاله بدبي عطى الشاهد اشكل