12‏/07‏/2005

المراجعات حاجه قرف


فعلا حاجه قرف
أمس رحت مدرسة الداخلية
عفوا وزارة الداخلية
انا وولد عمي دخلنا بوابة العلاقات العامه عطيناهم هوياتنا
ردت علينا الموظفه بالحرف الواحد
اقول بعطيك هوية زائر وحده مشوا حالكم فيها انتم الاثنين
طبعا انا النفس حامضه والسبب مراجعة واي مراجعه اكون بحالة قرف اذا ما اعرف احد بالجهة اللي رايح فيها لأن كالمعتاد مر علينا فلان مو موجود ما تمشي ناقصه الى اخره من سلسلة الاعذار اللي ترفع الضغط والسكر والقولون بإختصار امراض اللي يعاني منها المواطن الكويتي
المهم
رحنا لمكتب الوكيل
هم مرينا على جهاز التفتيش
والشرطي الموجود يسولف ويا رفيقه
طبعا انا لا طش مدام ان ما سالني ليش اوقف له ولا اهو بالاصل قاعد يطالع الجهاز
والا الاخ لاحقني طال عمرك وين رايح
قلت مكتب الوكيل
يطالع ولد عمي اللي وقف معاي وكان يومها الاخ مفرع يعني لا غتره ولا عقال ومو حالق اللحية
غيري انا
قال طويل العمر الهوية مالت الزائر وينها
قلت والله ياخوي يوم دخلنا
قالوا مشوا حالكم بهالهوية انت و ولد عمك
قال أجل ارجع لهم
قلت شنو
ارجع ارجع
قلت ارجع شنو اسوي
قال ماتدخل الا بهوية
قلت وانا قلت لأ
قالي مالي شغل ولا تطولها
( بداخل قلبي قلت وين طويل العمر قبل اشوي )
قلت تدري اشلون
دق عليهم وتأكد شنو يرجعنا بهالواهي والاهوب
وبعدين احنا دخلنا الوزارة خلاص
قال مالي شغل ولا تطولها
قلت تدري اشلون
مو بطولها الا بعرضها وامنعني
قال ترى والله اجرك
قلت
أتخسي ماني خروف
أضبط لسانك عدل
اهني تدخل ولد عمي
وقاله لو سمحت
وطلع له هويته الخاصه
كان يرد العسكري ويوقل
ترى علشان الرجال الطيب
قلت طز فيه
( اي قلتها ... صج ما أستحي بس لا احد يلومني شنو ولد عمي وانا شنو)
قال يا رجال روح بس روح
مسكني ولد عمي وقال
خلنا نخلص اللي جايين علشانه
وطاف
وبما اني مستعجل وقرفان مشيت
وانا نازل لحقني العسكري وقال ترى الغلط مو مني الغلط من اللي على البوابة
قلت له وشنذب المراجع
ماهو لعبه بين أديكم
وبعدين الخطأ منكم مو من المراجع
قال احنا مالنا شغل فيهم
قلت اي مو اهم بوزارة ثانية
المهم
دقوا علي الوزارة اليوم
وطالبيني
قلت لهم اسف ما اقدر اجيكم اليوم
خلوها يوم السبت إذا تبون
رد علي قالي لازم تجي
قلت له خلاص دز لي سيارة سيارتي بالكراج
قال تعال بتكسي
قلت له منو اللي طالبني انا والا انت
قال لا احنا قلت خلاص اتصلوا على تكسي وادفعوا فلوسه بعد
القصد يا أخوان من هالموضوع
ان المراجع لأي وزارة كانت لازم يعي الموظف الموجود هناك
ان المكان الموجود فيه لخدمة المراجع
وان المراجع جاي علشان شيئ يستحقه من خلال الامور الادارية الموضوعه لهالأستحقاق
مو علشان كل واحد يتعنطز عليه ويستحمل المراجع غلطات هالوزارة او الموظف
فرق كبير فعلا بين انك لما تراجع بأي دولة وبين مدارسنا
عفوا وزارتنا
اي صج
فيه هندي قاعد يفتر بصينية فيها عصير
ويبيع الكوكتيل على نص
والله ما ادري شنو التعليقات
لأن كل شي بهالموضوع يبيله تعليق من الرقبه
إرسال تعليق