09‏/06‏/2009

طاطا بطاطا


لا تلومون العراقيين
تدرون ليش
لأننا غيرنا التاريخ من غزو عراقي الى غزو صدامي
منو يتذكر قبل هالجملة
اللي بالتلفزون و بالراديو و بالجرايد
حتـــى لا ننســـى
انا واحد ما انسى
اتذكر سنة 2005 شهر سبعة كتبت
و اللحيــن اكررها و باكر بعد
***
عندي معامله بالدوام و ابي اخلصها بسرعه المهم معاملتي خلصتها من طرف المؤسسة بقت شغله ماكنت ادري عنها و الا شنو اثاري وزارة المالية تداوم بالمؤسسة عندنا شكو كان يقولون الرقابة قلت يالله المهم ناطر الشغله و الا الاخت مطلعه صبغ اظافر فسفوري احمر على المكتب و صابغه ايد و الثانية قاعده تشتغل فيها و تتحلطم مو عارفه اشتغل
الصراحة ما لومك شنو هالمسؤلين الخرطي شنو هالمهزلة و الله ما يستحون اشلون ما يعطونها اجازة طارئة علشان ما يلوعون جبودنا بهالمصاخة و القرف اللي عايشين فيه هذا اللي اسميه الغزو الحكومي للمؤسسات الخاصة سكت و انطميت و خذيت شغلي و انا منفس و اللوعة و القرف طافحين من خلقتي اشكره و اسمعها و انا طالع عند الباب عشتوا ، نسيت اقولكم انها مبطله الكمبيوتر على مدونتي كرهت التدوين بسبتج يا ذات الطلاء الفسفوري
***
استجواب بوحمود المتوقع، يعني يا اخوان الرجل قايلها من قبل غير هذا دائما اركز على تصويت اللجان اهو تصفية حسابات معلنه يعني ماكو شي جديد امس و انا قاعد اطالع الاخبار على الوطن ( اي قناة الوطن شعندكم تهتم بالاخبار المحلية و كويتيين مو قناة الراي الاردنية مالت بودي) الا و قاعدين ياخذون اراء النواب حول استجواب بو حمود اشوي و الا الدكتورة اسيل تهلهل بوه و الا بو حمود وراها و تقعد تقول تنمية و مشاريع حيوية و تطولها و اهي قصيره خلصينا يوبا رايك لما طاف بو حمود و الا تغرد به ان الاستجواب توقيته غيغ ملائم عفوا غير ملائم، على قولتهم يالليل الليل شكو التوقيت حجية اسيل، يوبا عذر التوقيت مال المجلس اللي طاف مو هذا نبي شي جديد

هناك 26 تعليقًا:

مـغـاتيــــــــــــر يقول...

موضوعك اليوم جكليت شكلك مو مركز

مممم صبغ فسفوري وتقرا مدونات مادري بس جنه ما يصير :P

أما عن أسيل وبوحمود لوول شفت المقطع في الأخبار ، أحس البراك ما يطيق أسيل بعد مناظرة الجامعة الأمريكية



تحياتي

Mommy S يقول...

aseel wama adrak ma aseel
wallah mani shaifa wala wa7da min elly fazaw kafo :P
o hatha raiee eshakhsi :)

بو حامد يقول...

يا اخي مسلم غلطان

نسى ان في بالدستور ماده تحدد مواعيد الاستجوابات !!

كل 11-9 تقدم الاستجوابات فقط

ساره النومس يقول...

لووووووووووووووووول



قلبك متروسة ...

ساره النومس يقول...

لووووووووووووووووول



قلبك متروسة ...

راعي تنكر يقول...

يبا الجماعه خايفيين على اجازة الصيف..حجزوا تذاكرهم وتوهقوا

Um il sa3af wil leef يقول...

والله فشله تصبغ أظافرها جدام الناس ؟؟
عرفت نوعها مبطله الكمبيوتر مثل ما تقول ، وبالدرج عندها دلاغات وإدسوس لونهم أسود محوح وعليه طبعات أصابعها من كريم الأساس وبالدرج الثاني فطاير وفوق المكتب جاي وحليب وداخل الجنطه حبة زينيكال .بوست طاطا بطاطا متوقع بعد تخليص أي نوع من المعاملات
:)
عندي فوبيا من المعاملات خاصه من الجنس اللي محسوب على الناعم

ARTFUL يقول...

ياخوي تعبنا

نبي الحق ونبي البورصة خضرة بس

;p

Eng_Q8 يقول...

فسفوري ؟؟؟ شهالساحره

المقوع الشرقي يقول...

صدام النوتى بوي
الباجى أنجلز
ذكرت بعد سقوطه الهيرالتربيون حاطت
كاريكاتير قتلنى المارينز بكامل عتادهم واقفين يقولون حق الايرانيين لما بدو يدخلون بنظره تكسر الخااطر ساعدونا عليهم
:)
صباحك عسل

الدســتور يقول...

بشوف اسيل مع خواتها
شراح يسوون

حسافتج يا كويت يقول...

حسين من مواضيعك أن عندك هم كبير

الله يفرج همك يا رب

غيغ ملائم هاااااااااا
؟؟


هههههههههههه

chandal/danchal!! يقول...

وايد نرفزتني... ليت من يفرغ باجي الصبغ على راسها




بخصوص مسلم بيك... ارجع لمقالة فؤاد الهاشم اليوم... صج برد جبدي واستاثم فيني

ابي تبولة ومحمر... دبس!

someone_q8 يقول...

السلام عليكم

الجار ما سوه جذيه و تجرأ الا لما عرف ان ربعنا كل ساعة مهاوش ومناجر ومداحر على اللي يسوى وعلى اللي ما يسوى فلقاها فرصة
مايدري الزفر ان الكويتيين وقت الصجية يصيرون كقالب الحديد مايهزك ريح

عاد اخوي بوأحمد لو معطي ام اظافر الفسفوري جم كلمة بالعظم ومشيت على الاقل اتحس على دمها وتستحي

بالنسبة للإستجواب

المجلس توه ما امداه استجواب ! اشدعوه بتطير الحكومة ولا خايف احد من الحكومة الله ياخذ امانته ؟

يعني كل سؤال موجه اخليه استجواب ؟؟ كل ملاحظة اشوفها اخليها استجواب ؟


ولا عشان الحلف على طول تبي تستجوب عشان ما يقولون ان النائب ما يوفي بوعده ؟

Unknown يقول...

شرايك بموظفة يوم الخميس إلي طاف تطق الطوفة وتنحاش من الدوام وما توقع انصراف
ويوم الأحد الساعة عشر طبعا غايبة .. بس تشرف حضرتها وتدخل مكتب المدير
وتاخذ إجازة أسبوع

U-Turn يقول...

part #1

ويييع هذول ما يعرفون شي بالدنيا غير البوق !!
ما عندهم لا شغله ولا مشغله غير يلهفون فلوس خلق الله @@


part #2
لووووووول
حرام عليك مسكينه
من زود الشغل خذتلها بريك وقامت تتصبغ
عيل شرايك بالي مطلعه الصبغ بالمحاضرة ورايحه @@ مندمجه !!
تتصبغ جدام الدكتور وتتعلج فوقها !!
بس ولا يهمك عشان جبدك ما تلوع
بحجزلها الويكند الياي ب nail bar :p
عشان ما تلوع جبدك
نيبها مصبغه وجاهزه


part#3
@@
ما أعلق على السياسه ;p
لأسباب خاصه ;p


ويعطيك العافيه
وعساك على القوه

حسام بن ضرار يقول...

اي والله ما ينفع فيهم إلا كتيبه بقيادة الشهيد فهد الاحمد تأدبهم على الحدود

قسماً بالله ما يتجرؤن هالكواوله

مركبنا يقول...

واخيرا نزلت بوست ما يخدش الحياء العام (=

انا بشتكيك عند تيته رولا (=

وانت الصاج اذا الغزو من تاريخنا محيناه شلون نطالب غيرنا باحترامه


يا خوي المنسدح الكل ياطية

kuwaiti_cool يقول...

وانا اشوف اغلب البنات يحطون هاللون اثره بسبتك
غير اسلوبك خلهم يحطون الوان ورديه ههههههههه

أندلسي يقول...

سلامن عليكم
آغاتي بو وليد
انا من يومين شفت تسجيل لجلسة الافتتاح كاملة تدري شنو الي شدني ؟
ان الدكتوغه وفي اول هجوم للنواب عليها وعلى زميلتها ويوم ما كاان صالح ساكت ومرزوق يمه خزرت الملا خزره قوية وقالت له بعصبية رد عليهم باتشيره بالايد وما هي الى ساعات لا بل لحظات حتى قام المغوار و اخو الدستور بالرضاعة صالح الملا وبدا سيفونية الدياي
عفوا قصدي الدفاع.
ياحلو هالمشهد كل دقيقه اعيده وودي ارفعه بس للاسف الهيوماكس صعب تنقل التسجيل الي فيه للكمبيوتر يبيله شغل ووقت.

enter-q8 يقول...

مـغـاتيــــــــــــر
********************
عسى مو محزر بس




shaikhoona
***********
رايك و احترمه بس تهقين ان التوقيت غيغ ملائم صج



بو حامد
*******
مو تدري صكوا غوانتانامو




طموحة مملوحة
***********
حيل حيل




راعي تنكر
*********
ان شاء الله انفلونزا الخنازير تنتشر بالدول اللي بيقضون اجازتهم فيها قول امين




Um il sa3af wil leef
********************
شفتي القهر




ARTFUL
******
ما يصير وحده من الثنتين




Eng_Q8
******
ناقصها مخمه بس



المقوع الشرقي
************
مسائك إشطه




أبو الدســتور
*************
غسيل قالت الوقت غيغ ملائم




حسافتج يا كويت
**************
بذمتك منو مو همه كبير خصوصا اذا كان بلد




chandal/danchal!!
****************
فؤاد الهاشم عاد
فؤاد حق الامور الخارجية اوكي لكن الداخلية خليه يقطع بطاطا




someone_q8
**********
ترى في عقده بالبلد اسمها استجواب ترى الوضع جدا عادي
استجواب اسئله سريعه فقط لا غير




Fantasy360
**********
خوش مدير هذا يبيله انقل عنده بس ها لازم اتحول شكلي




U-Turn
*******
نيل بار شيطلع هذا بعد




حسام بن ضرار
*************
ابد و الله




مركبنا
*******
الست رولا من شاف لبسها كله ابيض عبالك ممرضة




kuwaiti_cool
************
اشدعوة لا يكون مدونة خبير التجميل
حاكي عقالي شالله حادهم علي و الله لا يحدني عليهم



أندلسي
******
تكفى ابيه هالفيديو تكفى

أندلسي يقول...

ولا يهمك بحاول هالويك اند يكون عندك

chــاي أخضر يقول...

صاج

اهو بس تحويله إلى الغزو الصدامي

اهم بيشيلونه من التاريخ موليّه

مو مقتنعين ان ذيل "...." طول عمره عوي

حشاكم

مادري متى بيتأدبون

...

متابعينك انقصوا واحد
;P

فريج سعود يقول...

الحج مو بس لنساء النبي ؟

enter-q8 يقول...

أندلسي
******
بأنتظارك يالغالي
و لا هنت



chــاي أخضر
***********
انا اشهد انك صاجة
الا ما قلتيلي منو اللي نقص




فريج سعود
*********
اي نبي فيهم يعتمد
مو نفس سالفة الصعيدي اللي جا الكويت و ثاني يوم رجع لبلده
نبي شاي نبي قهوة نبي عصير

حرف يقول...

العزيز بو وليد

لي ملاحظه وأرجو منك تقبلها

الغزو مو عراقي

والغزو مو صدامي

ولكن الغزو نظامي

ولكل ما سبق تعريف يترتب أثر عليه

لا تغفلون سيطرة النظام المقبور على عقول الشعب العراقي لعشرات السنين

والكثير منهم لا يزالون يؤمنون ( جهلا وحماقة) بأن الكويت محافظة عراقية

وهذا ما ذكرته في إحدى قنواتهم الفضائية (الفيحاء) قبل شهرين تقريبا

قلت بصريح العبارة ردا على المذيعة بأن الغزو لم يكن صدامي وإنما نظامي

***

والحل في تعاطي تلك المسائل برأيي

لا يكون بالنزول إلى المستوى الشوارعي في الطرح

بل بتبني خطاب عقلاني متزن والإنتقاد لا يجب أن يشمل جميع العراقيين ، حتى وإن كانت نسبة كبيرة هي من تعادي الكويت

ولك التحية ، والشكر

فيصل