23‏/10‏/2008

الأخ العزيز مقص بن رقيب الكويتي


تحية طيبة و بعد
أخوي العزيز مقص
أكتب اليك رسالتي هذه عبر ما يسمى بالأنترنت و هو للامانة شيئ عجيب
تصدق يا اخوي العزيز أن فيه هوايل مو طبيعية
كل شي يخطر ببالك، اي نعم كل شي يخطر ببالك و ما ابالغ حتى أسال زملاء مهنتك اللي بوزارة الموصلات
تبي سياسة تبي ضحك تصدق حتى تشخيص علاج او مرض تلاقيه لا و ازيدك من الشعر بيت حتى لو بغيت شي غالي بالكويت تقدر تحصله ارخص مو مصدقني أسأل زميلنا شقران، او حتى اذا مو موجود بالكويت تحصله و يوصلك خلال يوميين
أدري طولتها وياك بمقدمتي الطويله، و انت خبرك فيني من زمان ، أخوي مقص ما ودي اطول عليك و انا عارف ظروفك هاليوميين، و أنشغالك بمعرض الكتاب اللي جاي، بس حبيت اسولف معاك و اقولك اني فعلا منصدم من هالجيل يا خوي مقص العالم تغير و الجيل الحالي مو نفسنا يعني قبل حدود استيعابنا كانت من محيط الثقافة و الاطلاع اللي نحصل عليها ايام قبل انا وياك لما كنا بالثانوية ونروح معرض الكتاب حتى بعد ما اشتغلت انت بوزارة الاعلام تتذكر يوم كنت اقولك مقص و اللي يرحم والديك في كتاب منعتوه يتكلم عن تاريخ دولة مجاورة و كنت ايبه لي و تحن علي بسرعة علشان ارجعه، لا ياخوي مقص الزمن تغيير هالجيل الحالي قاعد يستوعب اكثر منا و السبب هالانترنت و العالم صار صغير و اللي كنا نستفيد منه و احنا اعمارنا 21 و 25 اللحين اهم يسبقونا فيه و اعمارهم 16 و17 بيني و بينك انا مستانس اقدر اخلي ولدي و بنتي يعرفون كل شي و تزيد ثقافتهم خصوصا ياخوي مقص اننا داخلين على عالم جديد مثل ما تشوف و مو بالشهادات لا بالثقافه و الاطلاع علشان يقدريتعامل مع هالعالم ، بس يا خوي مقص بسألك ليش صار معرض الكتاب ماله لذه اشفيه شغلك صاير جذي ادش ماكو شي الاقيه حق عيالي الا كتب طبخ و عمل لفك السحر اقطهم على زوجتي اللي ملت منهم، مقص تدري ان الكتاب اقوى من الشاشة و تدري ان اهدائه لزميل يعني شي كبير و تدري ان تقضية وقت الفراغ فيه احسن بكثير
مقص بقولها لك و بكل صراحة سبب انقطاعي عنك اللي قاعد تسويه ما خليت لنا نقطة ألتقاء أبد يا خوي
و انت تعرف اني اعزك و اقدر دور عملك لكن يا خوي مو لهالدرجة
المرسل
أخوك / كتاب ممنوع

* عندي طلب صغير لأخواني هذا شعار صممته لحملة مناهضة التعسف الرقابي
اللي يقوم بها اخوانا عاجل ارجوا منكم المساهمه بوضعه في مدوناتكم مع فائق الشكر لمساندتكم

إرسال تعليق