06‏/10‏/2007

لاتحكم على مشية الرجل الا لما تلبس صرمايته


معليش الأيام اللي طافت إنقطاع مجبر

و السبب مو ظروف قاهرة و لا أسكندرية

السبب النفسية

و يمكن السبب أخر تعليق لي قبل الانقطاع

عند مدونة الزملاء

و طلع معاي هالتصميم


أتمنى يعجبكم مع انه سوداوي و لكن في بصيص أمل كبير

رمضان كريم و بالاخر العواشر أكثروا من الدعاء


لبلدنا

*******

عفاسيات

أخوي العزيز / حسام بن ضرار

وانا قاعد افتح إيميلي و الا شك بوم طلع هالشي بوجهي

فقلت أهديك هالشي

ترفيه أسلامي

صدقت يوم قلت باكر شنو بيطلع فيه

أتفضل شوف شنو طلع فيه

الشيئ الغريب اللي صار معاي

أني لما لغيت خدمة العفاسي مالت الرقية الشرعية كما كانت معلنه

ولقيتها بالاخير لما خلصت الرقية الشرعية

و أشتغلوا الاخوان علي

مقاطع من الايات الكريمة و أناشيد ما ادري من وين

واحلى مافيها لما يقولك رؤية فلان

دقت علي وحده و أكرر وحدة ( يعني صوت عورة ) من مكتب خدمة العفاسي

وانا توني طالع من زام ليل يعني عاض المخدة عض و زين ما فطرت منها ( المخدة ) طبعاً

الصوت العورة / السلام عليكم أخوي

حاكي عقالي /و عليكم السلام

الصوت العورة / أخوي ممكن أعرف ليش لغيت خدمة الشيخ

حاكي عقالي / اي شيخ على الصبح ومنو انتي

الصوت العورة / انا من مكتب خدمة الشيخ العفاسي

حاكي عقالي / لغيتها و خلاص

الصوت العورة / اخوي ترى احنا مو قاعدين ناخذ شي و ماهي مكلفه ورخيصة

حاكي عقالي / ( داخل قلبي و ليه يوبا هذي الدعلة ) اختي انا كنت حاطها للرقية فقط مو للأناشيد

و خلاص ما يحتاج يعني انتم قاعدين تجددون الاشتراك من كيفكم تلقائيا

و تدزون الرسايل مو كامله و تبون ندخل على الواب و نزلها و تقلون مو مكلفه صبه حقنة لبن

ما ابي اناشيد رؤية الواوان غصب اهو

الصوت العورة / أخوي احنا أعلنا على قناة الشيخ ( و تعلي صوتها على اللي جنبها ) أحنا مو حطينا اعلانات

ان الخدمة راح تكون أناشيد و شغلات ثانية

أخوي انت اللحين لو تجدد أشتراكك راح نعطيك اسبوعين مجاناً

حاكي عقالي / أختي قولي حق الشيخ أني أحترمه كمقرئ
بس فقط لا غير مو منشد أو الكويت ماهي للبيع
أو ترشيد كهرباء

الصوت العورة / أها

حاكي عقالي/ اي اها ممكن أكمل نومتي اللحين
***************

حكو مات

ما أدري قاعد اقرى هالمثل


"Don't judge a man until U've walked in his boots!"


حسيت أنه ينطبق

على حكومتنا و التمست العذر لهم

أتمنى أنكم تشاركونهم نفس الاحساس بالمسؤلية

اللي يتولد على مشي وزارتهم

*******************

المهندس عبدالعزيز العصفور


مشكور لدعم ونشرك ثقافة المدونات و تسليط الضوء عليها
حبيت اشكرك على التفاتك الجميله

للمدونات، و وصلت رساله للمدونين قبل القارئين ان هناك من يتابعكم

ولذلك فإن الكلمــــة أمانة

و لا ادري مهندسنا ان كان هذا الاستبيان من إعدادك
أم انه تشابه بين أسماء العائلة الكريمة عائلة العصفور

فقد وصلني و اعجبت به جداً

و أتمنى من الاخوة المشاركة به

إستبيان: تقييم العوامل المؤثرة على الثقة في الحكومة الإلكترونية في الدول الأقل تقدما

هناك 12 تعليقًا:

bass يقول...

كلامك بخصوص الحكومة أنا معاك 100% يس يبيله حزم منهم ورفع الجامه !!

أما عن التفائل والامل الله يسمع منك ومنى أن شاء الله وترجع الكويت مثل قبل وأحسن الله كريم .

Bad-Ran يقول...

خوش شعر والله

Q8DOLL يقول...

بوست رائع ومنوع صراحه استمتعت

التصميم حلو
رغم السوداويه كما ذكرت يوجد نور انشالله قريبا نراه
وتنقشع هذه السواده
محتاجين هالأمل
ومالنا غير الدعاء للرب القادر على كل شيء
ومن هني يطون أملنا لأن دينا علمنا ان ما نيأس من رحمة الله
والتغيير الإيجابي لو كان بعيد
فإنه بإذن الله قادم
----------
للأسف انا أيضا أحب واحترم هذا الشخص
لكن
المتاجره بالدين شيء ينرفز وجعل الكثير منا نغير فكرتنا بالعفاسي
مادري غلطة منو
غلطته انه تعاقد معاهم ؟؟
او غلطة الشركه نفسها باستخدامها للشيخ ولموهبته؟
الحوار اللي دار بينك وبين الأخت فعلا صار معاي بس كنت صاحيه ومافيني نوم .. فعلا دقوا علي يسألوني عن السبب في اني ألغيت الخدمه اللي عورت راسي بالمسجات كل شوي والدعايه
للأسف الموضوع صار طراره
كأنهم ناطرين هالبيزات اللي مني ومنك عشان مساكين ماعندهم فلوس !!..

----------------
الحمدالله في أحد يشجع المدونات في الصحافه ويتابعها بإيجابيه
ما ننسى الهجمه العفنه التي شنتها جريدة العفن ضد المدونات

--------
انشالله سيتم المشاركه في الاستبيان

قواك الله وأزاح الهم والكدر عن قلبك

حسام بن ضرار يقول...

ههههههههههههههههههههههاااااي

شفت شلون بوليد؟

شفت شلون؟

و القادم اكثر

استغفر الله العلي العظيم

الواحد ما وده يتشمت او يتصيّد، لكن شنو اكبر من المتاجره بالدين و الهروله خلف الشهره بالاكو و الماكو و بالداخله و بالطالعه؟

يا استاذ مشاري،، الله شرفك بحفظ كتابه و اكرمك بالصوت الشجي و جزاك الله خير سجلت لنا هالتسجيلات العطره من آي الذكر الحكيم

و الناس عرفتك و صرت اشهر من نار على علم

شاللي ناقصك عشان تكمله بهالكليبات اللي ما خليت موضوع ما صورتها عنه؟

و هالاناشيد اللي لها ناسها ولها سوقها؟

و هالخدمات و الدعايات و الاعلانات اللي لم تبقي ولا تذر و دشت بكل شي؟

سوأل: هل انتم الوحيدون الذين انعم الله عليكم بحلاوة الصوت في تلاوة القرآن حتى تسلكوا تلك المسالك الاخرى الربحية و الغير ربحية؟

عبدالباسط
الحصري
المنشاوي
ائمة الحرمين
العجمي
الغامدي

و غيرهم و غيرهم

كلهم اصواتهم عذبه و لهم انتشار

ما شفناهم إنكبوا على الاعلام و الاستغلال التجاري مثل حضرتك؟


اما بالنسبه للذين يقولون ان العفاسي مستغل من الشركات التجاريه و ان الموضوع مو بإيده

فأقول، هالحجه الواحد يصدقها مره ... لكن مو كل مره

و بلاش الترقيع ،، المسأله اتضحت و النفعيه و الربحية و الرغبه في الشهره من خلال مجالات اخرى غير القرآن الكريم صارت واضحه

--------------

اما الصوت العوره

فهذا يمكن يعطيك مثال على التناقض اخوي بو وليد و ان الموضوع بالفعل تحول الى تجاره و بزنس للأسف الشديد

و راح تشوف أهوّل من جذي و تطق على راسك

و تذكر كلامي

قبل لا انسى: شوف فهد الكندري اللي مسجل له فيديو كليب على قناة الوطن عن شهر رمضان

ما ادري شلون الواحد يصلي خلف شخص - مع احترامنا له - مستعد يخل من وقاره و سمته بالتغني و التعصّر على شاشات الفضائيات بما يسمى بالكليب الاسلامي


اخيراً وليس آخراً: العفاسي قاريء و ليس بشيخ

بو حامد يقول...

تصميم جدا رائع وتسلم ايدك والله لايهينك

والله يصلح حالنا وحال ولي امرنا وبطانته

والامل موجود ان شاء الله

والمثل ينطبق ونص :)

وعلى سالفه العفاسي انا من زمان ما احب المنشدين يا اخي الواحد يا يسمع اغاني ولا لا يسمع شي نص ونص ما ادري شلون استغفر الله

كن بخير

جبل واره يقول...

تصميم جميل وراقي جداً يا انتر كويت
وسوداوي صحيح بس مناسب للوضع الحالي والي قاعدين نعيشه للأسف

كل الشكر اخوي الغالي

Unknown يقول...

خيرك لغيرى والشقا والعنا لي والمشكلة انك عارف كل الاحوال

:)

هذا ادزه لى بو صباح

وتفاءل لى الحين فى أمل

LiL ALiEN يقول...

عطني رقم "الصوت العوره" خل اشترك معاها

بس وذمتك يوم يوم قالتلك ليش لغيت خدمة الشيخ .. ما هرهر بطنك؟

حد القلم يقول...

انا لو بافتح ملف العفاسي بابكي عليه و على الحال الي وصل له

خصوصا انه كان زميل سابق بالكلية و اعرف حاله من ايام بداياته بمساجد العارضية و مشرف

يكفيك اخوي بو وليد تقارن بين صوته قبل لا يوقع العقد مع الشركة و بعد ما بدا ينشد

اللهم انا نعوذ بك الحور بعد الكور

اما بالنسبة للصوت العورة فالبزنس ما فيه عورة

و المثل عن الحكومة صحيح لكن بعد الخمس دوائر ما راح احد يعذرهم

غير معرف يقول...

ولكم باك
:)


سؤال انت دازلي ايميل ؟؟؟
لاني دورت ايميلك بالبروفايل مالك مالقيته فحبيت اسال ؟؟؟

enter-q8 يقول...


Bass


هلا والله اخوي بس و شرفت مدونتي

طال عمرك بخصوص الحكومة

يبيلهم حزم مع نفسهم قبل ما يكون لهم حزم على الاخرين

و الانسان لولا الامل كان مات
و طبعا رحمة رب العالمين
والله يحفضك يا كويت

********


Bad-Ran


اكيد مدام من بو فهد

********


Q8DOLL


مرورك الاروع اختي

مثل ما قلت لأخوي بس
الامل و رحمة رب العالمين

ولولا هالشغلتين
كان لقيتينا مثل باقي الجمهوريات العربية
مغتربين و قاعدين ندور العيشة
----------
بالنسبة للعفاسي
او غيره من اهل الهبة الجديده
اهل الفيديوهات و الاناشيد
انا مو مشكله عندي اطرب لبعض الاناشيد
لكن رجل يأم مصليين و يتلو عليهم اشرف و ارقى كلمات على وجهه الارض و يقعد يدخلي الكويت ماهي للبيع لغراض سياسية و الا ترانيهم ما ادري اشلون صايرة ويقلبها تجارة
و رد اخوي حسام بن ضرار يفي بهالنقطة
---------
في ناس يشجعونها بالسر و بالعلانية و في ناس يبقون منها
وين ايامك يا بدر الكويت
تكشف صحفيين بو طقة
أما جريدة الوطن الهجمة انا برأي كتبت عنها
و اللي هاجموا المدونات بالحملة اقل من اللي اشادوا فيها
لأنهم كتاب اصلا ما ادري على شنو سمو نفسهم صحفيين
ما ادري منو يقرالهم نفس القناعي
----------
و ارزاحه عن قلوب كل الكويتيين ان شاء الله

********


حسام بن ضرار


انا ادري انك اول واحد كنت بترد
والله يا حسام اني للحين محتفظ برسايل دزوها لي عقب مالغيت الخدمه تقول طراره
بس اللي فاجئني فعلا اشلون نط علي بالهوت ميل

بس شفت الكندري
قاعد يعوم على عووم العفاسي

مع ان استغبر الله ما ادري منو اللي حطه مقرئ

و مثل ما قلت مو شيخ دين
وهذا الغلط اللي طايحيين فيه
في فرق بين شيخ دين
وقارئ

********


بو حامد


هلا يا خوي و تسلم ايد مدونتكم و ايد بوفهد اللي خطت لنا هالكلمات

و المثل مو ينطبق
صدقني ينطبق بكل حذافيره
و الجوتي اعزك الله بعد


أما الاناشيد ما ادري انت لو شايف حلقة العوضي مع العراقي اللي ينشد
و قاعد يقوله مقام السيكا و الدو و التخت الشرقي
وقاعد يشدو بصوته على موال ناظم الغرالي
كان كسرت التلفزون
اللي ضحكني يوم يقوله
البيانو في اصابع بيضاء و اصابع سوداء
انا اسوي طبقة الصوت على نمط الاصابع السوداء اللي في البيانو


مالت على البامية

شنقول بعد

********


بو فهد


هلا باغالي

الربع بالدوام و اللي بره الدوام
كل من يخلص قراية هالكلمات
يقووول
أااااه

شسويت فيهم يا بوفهد

الشكر لك يالغالي

بو فهد لو سمحت ايميلك
انا ايميلي
enter-q8@hotmail.com


********


Mishari


المشري احنا شنو معيشنا الا الامل
ياخوك

همسة
ترى مهوس على بوصباح هاليوميين
بالجريده

و للأمانة
انا واحد احترت مع شخصية رئيس الوزراء
يطالب بالاصلاح و ي وووووو
ولكن يشكل وزراء تيش بيش
ما ادري شنو يفكر فيه
ترى صار اصعب من فوازير رمضان

********


LiL ALiEN


شفت اشلون يالزميل
قال ايه قال شيخ
لا تخيل راد من الدوام خلاص متخدر
يعني الفراشششششش ثم الفراشششششش
و يجيك التلفون
تقول اكيد في مشكله بالدوام
تطلع الاخت و تقولك شيخ بعد
وليه
واذا تبي رقمها والله اعطيك اياه للحين موجود باللوجو مال التلفون
بس ترى تقول تكلم واحد من الربع
يوم اصرخت احنا مو اعلنا بالقناة
و دعلة بعد

********


ابن زيدون


والله يا خوي انت قلتها
الصوت تغيير حيل حيل
و خصوصا انا كنت اسمع له فقط بقراءة معينة مثل


قراءة خلف عن حمزة


و مثل ماقلت البزنيس مافهوش عورة

********


حمودي


أهلا كبتن اي دزيت لك طال عمرك تهنئة العيد
و من ايميلي الرئيسي مال السايت
enter-q8@
تقدر تحط
hotmail.com
او
msn.com
و كل عام و انتم بخير

حياتي هدف مو عبث يقول...
أزال المؤلف هذا التعليق.