15‏/09‏/2007

حكومة قوية ، حاكي عقالي ، فن ، حاكي عقالي، وضع البلد



اخوي العزيز

Bad-Ran حمودي

سالني بالبوست اللي طاف شنو يعني

حاكي عقالي

الاجابة بسيطه لكل من تسال

شنو حاكي عقالي

حاكي عقالي هي اجابة عن عدم الرضا او التصديق

اشلون على سبيل المثال لا الحصر


لما تقول : ان الجرايد وطنية و ما تتكلم

الا بلسان المواطن و مو مصالح اصحابها



راح اقولك : حاكي عقالي


*\/*

لما تقول

أن الحكومة سياستها الداخلية و الخارجية حازمة وقوية

وماهي طوفه هبيطه


راح اقولك : حاكي عقالي


*\/*


لما تقول : أن الحركة الفنية بالكويت راقية

و في ممثلين كويتيين

واذا مافي يجنسونهم

علشان اخدموا الفن

و ارفعوا اسم الكويت بالمعاير و الحط بالمسلسلات


راح اقولك : حاكي عقالي


*\/*


لما تقول : ان الوضع السياسي بالبلد مستقر

وان اللي يحصل حالياً اهو شيئ عادي



راح اقولك : حاكي عقالي


*\/*

لما تقول

ان العرب صاروا سنعين

راح اقولك انك قاعد تحلم


*\/*

هناك 13 تعليقًا:

متفرغ يقول...

تسلم على هالمعلومة الزينة ..... شخبارك مع مسلسلات رمضان ؟

Unknown يقول...

يعنى نفس ما تقول بالانجلش
talk to the hand :P
ههههههههههه
معلومة جميله يا بووليد وما قلتي يا طويل العمر اللافي شسميته؟

Unknown يقول...

أولآ يسعد لي مساءك ياغالي
وثانيآ أشكرك على عمل الأيقونة في قسم الرجال وكم فتره تمنيت تصميم مشابه لها من اجل نشر مدونتي ولكن لعدمية الخبرة الكافيه بهكذا اعمال وقفت حاجز ،، لكن التسهيل الذي رأيته من جانبك يجعلني أقول لك شكرآ

وعن المعلومه فحقيقه من فتره طويله ومن خلال متابعتي الدائمه كنت أتسال كثير عن المسمى حتى أزعجت اصدقاء كويتين لي عن المسمى فجميع اجوبتهم كانت تقول لي : قفشات ، كنت اتسأل حاكي عقالي ماعرفتها عشان اعرف الثانيه

وحاكي عقالي كمثل القائل السعودي " يجيب الله مطر " ربما يكون هنالك مدون بهذا الاسم فاردت اثراء المعلومه هههههههههههه

غير معرف يقول...

يعني بالمشمش ؟؟؟


:)

Fahad Al Askr يقول...

أعتقد العقال ممكن مع التكرار يفهم

نون النساء يقول...

حاكي الملفع

ولتاء التأنيث نصيب في المعنى المقصود

:/



انتررررررر
أبي هاذي كود اللي بالزاوية
نبيها أخرص

ْ_ْ

يمكن اطبعا على تي شيرتات أخواني الصغار
واطلع فيهم اي مكان عام

غااااااااااالي غااااااااالي
الله يخرب بيوتهم

KQ8 يقول...

محنا خالصين يا بوليد

يصير خير وانقز

حسام بن ضرار يقول...

اشكرك


لو مخلي السوأل من ضمن اسئلة فوازير حليمه:

شنوووو مااانااا حاكييي عكالييييييي؟

أبو شملان يقول...

هههههههههههه


صج حاكى عقالى


:)

sologa-bologa يقول...

اولا كل عام وانت بخير
ومبارك عليك الباقي من الشهر

وسؤالي
اذا العقال رد علينا وفهم
شنو بنحاكي عقب
!!!

اتمنى سماع الاجابة بعد شهر رمضان المبارك
;p

ودمت بحب وود

nEo يقول...

حاكي = حاجي ؟

و لا حاكي = حاكي فقط ؟


ماهي راضية تركب يا حجي

enter-q8 يقول...


متفرغ


الله يسلمك يالغالي ، بعد مسلسلات رمضان شوف البوست الجاي الله يعينا
يسلمو


المشري

تقدر تقول حاجه زي كده يعني واللد سميناه على اسم الوالد بناء على رغبة الوالده مو الوالد، شفت شلون


لجوء قلم

هلا والله و لاشكر على واجب بالعكس هالقائمة تزين مدونتي وتشرفني باصحابها، و ترى مثل ما انت شايف هواية


حمودي


تقدر تقول اذا حجت البقر لأن المشمش ينزرع باي وقت اللحين


فهد العسكر


هلا والله اخوي فهد
هذا العقال احنا نبي غير العقال اللي يفهم


نون النساء


يرحم والديك اسمها نبيها ارخص مو اخرص خالص
تلاقينه بالموقع مال الحملة


كاراكوتا


يجيب الله مطر على قولة اخوي لجوء قلم


حسام بن ضرار


هلا بالغالي
قاعد اقرى تعليقك و ميت من الضحك
تدري عاد لو قالتها حليمة ما اخلي احد يحاكي عقالي لأن الشخصية المرموقه حليمة اللي افتتحت ما ادري شنو بالسفارة البريطانية تكلمت عن عقالي

عشنا وشفنا ديرة بطيخ



بوشملان


شفت اشلون


sologa-bologa


لا تخاف و لاتحاتي
لأن الاثنين ما راح يفهمون او يتكلمون



nEo


عمو ترجمها باللهجة الكويتية
و علشانك عزيز بترجمها لك بلغات متعدده

بالسوري
إحكي لعقالي

بالمصري
كلم الحاجة المدورة اللي فوق دماغي

بالهندي
بادكارو شوورته

بالانجليزي
talk to my eqaal

بس خلاص

sar7an 3abdelba9eer يقول...

khosh ma3loma walla ma ga9art , oo 7aky 3galy :r