22‏/07‏/2005

تعال عندنا سرسره، لا دير بالك ترى احنا محترمين

تعال عندنا سرسره، لا دير بالك ترى احنا محترمين
ادري وايد راح ينتقدون عنوان الموضوع
بس يا جماعه هذا والله اللي قاعد يصير
لما يا محفوظين السلامة
اقول حق واحد تعال براويك شيئ عمرك ما شفته
وهالشي رايح فيها شغل إغتصاب او او او
يعني دعوة الى الانحراف وقلة الادب
و أول ما يروح هالمغفل
تطلع له شاشه ترى إحنا ناس ملتزمين بشرع الله والاخلاق وممنوع الصور الخرطي
طبعا اغلبكم اللحين عرف شنو قاعد اتكلم عنه
قاعد اتكلم عن دعايات المنتديات اللي تلوع الكبد المتروسه في
Junk E-Mail
مثال


أنزين ليش هالاسلوب
وهالمثال أهون ترى
أنا اتكلم بصيغة عامه
مثل صفحة الراي العام الاخيرة
اللي تقول قاعدين في نيويورك على هالجرايم اللي يحطونها
اسلوب خدع القارئ اسلوب رخيص
ولنفترض ان هالانسان وسطي يعني مو زقمبي
مثل ما نقول
ليش احاول أجره بهالاسلوب واخليه يدور هالسوالف
بالاخير
القولون منتفخ
كأني حامل بالشهر الثالث
حاجه ترفع الضغط

هناك 7 تعليقات:

نون النساء يقول...

خخخخخخخخخخخ
عادي لو تشوف الجنك ميل اللي عندي
تبط راسك والله
تعال شوف الفنانة الفلانيه وهي مادري شنو

تعال شوف فضايح الفلاني العلاني واهو كذا
لا اتعب عمري ولا هم يحزنون

ديليت على طوول عرفنا حق سوالف النت خلاص

وسلامتك من القولون انت لو اتبطل شغل العصبيه
واتهد التدخين
انته لو تسمع الكلاااااام

هففففففففففف

ولا الاه الا الله لا الاه الا الله

esTeKaNa يقول...

وي وي اسم الله عليك
بعدوينك الضغط ان شالله وحرقه الاعصاب
:)
ازيدك من الشعر بيت
كل هالسوالف جذب ومن خيال الكاتب
والله نقرا القضيه مرات احداث بسيطة والكاتب يسويهها فلم ويزيد عليها بهارات مالها سالفه ولا معنى

وسبحان الله اليوم قاعده اقول انا شنو استفيد من خبر الخدامة انحاشت والهندي دش البيت وهالسوالف الماصخة؟

خوش بوست:)

Eb9ara7a and his Wife يقول...

الله يهداهم بس
ذكرني كلامك بواحد من الربع أيام أمريكا كان يقول : لازم اندش اماكن الخراب و الهشك بشك عشان نعرف الصيع شلون يعيشون و تالي نرد عليهم و نهديهم للطريج الصح
!!

و آخر شي طق الرصيف و عر صوبهم لولا الناس السنعين اللي ثبتوه و نبههوه قبل لا ينحرف

النصيحه واجبه بس مو بالطريقه اللي اخلي فيها عنوان الآيات و الاحاديث عباره عن جمله وصخه او إيحاء جنسي
!!

7amee elDyar يقول...

الجمهور عاوز كده

بعضهم يدورون هالسووالف

وبعضهم مجرد فضول وحب الاطلاع على الفضايح

بس طال عمرك بالنسبة لمواضيعك الحلوه

اقترح عليك لهذا الموضوع وضع تعريفات بالهامش لبعض المفردات مثل زقمبي وغيرها

خاصة اننا في عصر العولمة وتوقع انك تشوف مثلا يابانيين يقرون بوستك

راح يترجمون كل شي ماكو مشكلة


بس راح يتوهقون بهالكلمات

enter-q8 يقول...

الله يسلمكم ويديم عليكم الصحة والعافية
ولا يبلي عزيز عندكم بامراض العصر الكويتية الطابع وهي القولون والسكري والضغط

كل الاراء اجمعت على هالشي وان اسلوب خاطئ
وايضا كان لي في هالموضوضع مأرب أخرى مثل الصفحة الاخيرة بالراي العام
اللي والله بحس ان بعض المنتديات اللي تكره الكويت يمكن يخصصون قسم اسمه الكويت والكويتييون
ويشتغلون نسخ
من الراي العام والا مجلة الجريمة
ليش الزوم الوصخ مالهم على الاحداث العاديه اللي بكل مجتمع
يعني مو تقول قاعدين يعالجونها

اليوم صايره سالفة عندنا بالدوام
تخطيت فيها كل الامور الادارية والهيكل الاداري ووو
واخرها طبقت فعلا
حاكي عقالي
سويت اللي براسي
وبعدين سويت تقريري
فا بعدها اخذنا نتداول الامور اللي ذكرتها بالتقرير وتشاء الصدف
ان في إدارة جديده شغلتها مراقبة هالشيئ
وامتدحت تصرفي وووو
اخر شي وانا طالع لحقني احد مسؤلين هالادارة وخذاني بكلمة راس
قالي بو وليد
شغلك ميه ميه وو لايهمك وراح يتعدل الشغل واحنا معاك ووين تبي توصل له في غرض المصلحه العامة

قلت له بو فلان
قالي هلا
قلت عندك انترنت بمكتبك
قالي اي
قلت الله يخليك دش على هالعنوان واقرى البنر اللي فيه
وراح تعرف ردي


اتصل علي وقالي ما كتبت هالكلمة يا خالد
الا ان الشق فعلا عود

ما ادري شنو دخل الموضوع هذا بهذا
ولكن احس ان الامور كلها متشابكه

وحامي الديار
ياخوك صارلك مده حارمنا من سوالفك الكويتية
عطنا هالتعاريف
انا راجعت معجم اللهجة الكويتية لقيت كلمات قاعدين نسمعها بالشارع ونتداولها عادي
واثاريها مصيبه سوده
خذ مثال
لوتي
ولما نقولها حق واحد شيطان ايا اللوتي
اثاريها غير
والصيف غير
وتقعد بالبيت تحاول تطبخ
وتغسل المواعين بعدها بروحك غير
كفايه بس خلاص

EXzombie يقول...

اقول بو وليد سالفة تخصيص المنتديات لأقسام خاصة عن الكويت و الكويتيين مرت علينا و عليك و انت أكثر واحد يدري ليش طلعت..... اهي كلها موجوة و موضة اليوم الموضة تسب كويتي باجر تلعن العراقي الّي عقبه اسرائيل و انت لحق ما تلحق....!!! الرأي العام اذا ما نشرت عن هالمواضيع ترى بيطلعون ناس و ينشرون هالمواضيع و بيركزون على تجاهل او محاولة اخفاء هالمواقف عن الناس و بيطلعونا غلطانين غصب و صاحبك مفيد فوزي او عبدالباري عطوان اول ناس يتراكضون بهالسوالف و شوفهم الاول يدور الزلة على الامارات و الثاني يلحس الفلس و يمشي بالمظروف

المهم زين طحنا عليك بالبلوقات و عاش من سمع أخبارك

خلصت كلامي

qalm-jaf يقول...

الله يعطيك العالفيه
العيب مو فى التكنلوجيا العيب فينا احنا لسوء استخدام التكنلوجيا
من قبل دخلت السيارات على الخليج علشان الواحد يستفيد منها الشباب يفحطون عليها
وبعديل تلفون البيت ازعاج العالم ومغازل
وبعدين الموبايل والبلوتوث والخرابيط والفضايح
وبعدين النت والفضايح والسب والخرابيط العيب فينا احنا
وبالنسبه لجريدة الراى العالم وتحديدا الصفحه الاخيره قمت السخافه والسذاجه بس المشكله فى ناس تقرا الجريده مو من الصفحه الاولى تبدا من الصفحه الاخيره من كثر حبهم للسخافه
انا لو مطوع اصدر فتوه بتحريم جريدة الراى العام
(: