19‏/07‏/2005

إي يصير خير أبلع العافية أشلونك انت زين



ليش لأ يمكن نعم
ويمكن أغسل إيدك
ويمكن إستريح زين ما عندك سالفة

ويمكن حتى لو صار
إشدعوه بهالسعر
نسافر شرق أسيا أرخص

يمكن صح ويمكن غلط

يمكن إني أشوف ان الكويت تقدر واهي قادره بإذن الله
أنها تسبق كم دوله خليجية بهالرؤية
من خلال
السبعين الف موووووووول اللي منتشرين

ويمكن إني اشوف ان السياحة العائلية بالكويت لدول الخليج إذا تمت حسب الرؤية اللي ببالي ويتداولها العديد من الكويتيين يفضلها العديد

ويمكن أن لو يفتحون الاسواق ويخفضون الاسعار والمنطقة الحره تكون فعلا حره مو جايبه بضاعتها من أسواق دبي الحره بس

يمكن لما أستثمر أحد هالجزر الصغيرة و أنشئ عليها فقط مصح ومنتزه للعلاج الطبيعي على إمتداد هالجزيرة
واعطيه لأحد هالشركات المتخصصه بهالمجال

يمكن لما أصحصح شعبنا وأقولها انك فعلا شعب مضياف
وهذا موجود ومو يمكن
لكن هل من الممكن
ان يكون مضياف بتعامله مع بعضه لما يسوقون السيارات يمكن

يمكن لما أنقل نادي هواة رابطة السيارات ومضمار الربع ميل
الله يخلف علينا تقول ما في اراضي من مكانه من جنب منطقة اصبحت سكنية الى ما بعد الاحمدي والاراضي اللي فاضيه فيها
خصوصا ان اغلب الشباب الخليجي
يحبون هالهواية وتعتبر الاحمد الاقرب لهم من خلال المنفذ الحدودي

ويمكن من خلالها أني افتح الشقق الفندقية
و أزيد هالمجمعات مثل ما اهو صاير اللحين
وأزيد مشاريع الشاليهات

ويمكن أطور الوفرة الزراعية
ويمكن هيئة الزراعة والثروة الحيوانية تفتح حديقة حيوان سفاري مفتوحة مصغرة بقرب الوفرة

ويمكن أنها تقوم بتنظيم رحلات لصيد السمك سواءا بالخيط او بالغوص بالمسدس

يمكن أن تقوم بلدية الكويت بعمل مخيم الكويت بشكل متطور
وتقسمه وتنظمه على شكل قسائم ومكمله ومجهزة من كهرباء وخيم وماي
مقابل مبلغ تامين وإيجار معقول

يمكن أن تقوم المشروعات السياحية بعمل دياريف ( ارجوحات )شغل قبل بجانب مخيم الكويت

يمكن أن نشوف المحافظات وكل محافظ يسوق حق محافظته ويخصص شهر لها من مهرجان على مدار السنه كل محافظه شهر شهر ونص

يمكن ابلع العافية
و ارد حق مطارنا الوردي
واقول احلام وردية
يمكن ليش لأ

هناك 8 تعليقات:

Eb9ara7a and his Wife يقول...

Khaled
يمكن .. ليش لا

esTeKaNa يقول...

احلم الاحلام ببلاش
وما تدري كل شي بهالدنيا يصير
:)

enter-q8 يقول...

أمان وانت الصاج
بسنا فلوس بسنا فلوس


هلا بأهل البحرين
البحرين كنت أحب اروحها قبل واقز بهالاسواق القديمة الحلوة ومعاي كاميرتي كني صج
وازور عيال بوحمود
اللي يغثوني الصبح بريوق مو طبيعي
باجا
أحد يتريق باجا
ايام حلوة


بصراحة
أعكسها
لا ليش يمكن


إستكانة
هم يمكن
وعلى قولتهم حلم يوبا حلم
بس ترى صج يقولون عن تطوير فيلكا وحطوا الميزانية
600
مليون دينار كويتي
واذكر ان هالتصريح طلع بجريدة الزمن
وأكد الوزير الحميدي إن تشغيل الجزيرة سيكون بعد إنجاز نشاطات المستثمرين وأن العمل سوف يبدأ في نهاية عام (2005) والفترة القصوى لإنجاز المراحل المختلفة وإتمام عملية تطوير جزيرة فيلكا نهائياً بعد خمسة أعوام من بداية الإنشاء أي في العام 2010.
ها أقولها حق الحميدي والا اسكت
خلني اقولها تكفون
حاكي عقالي اذا تمت سنة 2015

يا بن عاقول
اول شي الله يعينك على اهل لندن
ويع ما بحبهاش بكرهها بكرهها
والا لما يتميلقون
يو هاف أكسنت
اكيد أكيد عندي أكسنت
امي مو اسمها مارغيريت
والا ابوي اسمه بيكنهام

والله يا ولد عمي انا طحت بأمريكا وقبل أحداث 11 سبتمبر
بسنتين
طحت بشرق اسيا
سنغافورة ماليزيا تايلند فيتنام
كله ما خلتش حاجه
رخص واشياء غريبة
ورقي لونه اصفر
وهالفاكهة يالله من فضلك
لقعدت على البحر
ومعاك شيشتك ومال الربيان المشوي كل اشوي يروح ويرد عليك
وتاخذ منه فحم بدال الربيان
وجنبك
مسجلتك الصغيرة
مشغل أسكتش شهر العسل
شي شي

نون النساء يقول...



لووووووووول

عفيه مو احنا شعب التحلطم

بعدين الامانه تنقال منو يقدر يتحمل هالحرارة


واحنا بالكويت بمقدورنا نسوي اكثر من جذي

بسسسس ماكو مشروعات عدله مالت عليهم
وان اطلعو بشي زين قطووه بالدرج


ههفففففففففففف

7amee elDyar يقول...

صراحه افكارك عجيبه

يا ريت يحطونك وزير سياحه عندنا

enter-q8 يقول...

حق الشماته يا سعد

بو طارق تدري فيني
انا ما عندي اعتراض
والله يديم الحكومه
وعلى قولة الله يرحمها
جدة واحد من الربع تعرفه عدل
تقول مدام الحليبه ويا الجريده قاعده توصلكم لباب البيت اشتبون بعد

بو طارق انا والعياذ بالله من كلمة انا
اتمنى
وخصوصا حق الفئة اللي تقول انها تقعد 10 شهور بالكويت
بو طارق بذمتك قبل ايام الصيف كنا نقعد بالمكيفات لما نطلع الشاليه والا نروح فيلكا
سواء الجو كان غبار او لاهوب

أسأل الربع اللي دوانيتهم ايام الاثنين
وين كنا نقز
والله سوق السلاح
عمرك شفت ناس تروح تتمشى بسوق السلاح
لا وبعد ما كان في سايق ولا شي
الله يعز الباصات الزرقا
شيييييييط
قاعدين كلنا جريمبات وصفقه ورا
و ويانا صاحبك اللي بالفيحا
ونغني
جن الظلام وهاج الوجد بالسكن
الكويت حلوه ونقدر نخليها احلى


يا فايلكا
والله قبل ما ادري شنو كانت اجسامنا
يعني ايامنا ماكان في تكيف بالمدرسه
ومواعيدنا كلها الظهر علشان نتجمع
واذا تواعدنا وين نتواعد بمنطقه محايده
يعني اللي يوصل قبل يخيس لما يوصلون الربع كلهم
والا يقزرها ببطل بيبسي
والا ميراندا فراوله تخلي لسانك احمر

انا عن نفسي لما الله يرزقني بولد
بشتريله قاري
يمكن لحق عليه بو طارق
اسمه
BMX
واخليه ما يطلع الا الظهر يبي يبي ما يبي لا يطلع
واخليه يلحق عيال بو طارق ويفلعهم بطابوقه
علشان يصير رجال
أحم أحم
هههههههههههههه
نسيت اقول ان القاري نحط علي التاير اللي ورا قوطي سانكيست
علشان يطلع صوت كأنه سيكل
لاحد يقولي جيب لهم بانشي
فال الله ولا فالكم



هلا اخوي حامي
طال عمرك نعتز بترشيحك
وبأحاول اروح حق طويل العمر
واقوله ترى الاخوه بالبلوجات مرشحيني اصير وزير السياحه بالتشكيله الجاية
و أيضا من منطلق
المحاصصه لأن ما عندنا وزير عتيبي
اشرايكم البس شنو لما اروح تي شيرت
و وزار
وجريمبه شماغ
علشان اكون جامع بين كل الطوائف الكويتية
تي شيرت اكون من العلمانية
الوزار بحري
الشماغ بري
واكيد
يمكن ويمكن لأ



بنت عم بو طارق
لا إستراليا ويع ابي الكاريبي والا البهاما
والا بورتريكا
بس خوش اقتراح
راح اطرحه لما يوصلني واكون معالى وزير السياحه الكويتي

نون النساء يقول...

@@

اتصدق مووش ئادره اتخيل انك
كنت ياهل ومراهق وشاب شيطان


يعن ما ادري شلوون مو قادره

لا تقول كلمة نقز بسوق السلاح مو راكبه ترا

هههههههههههههههههههههه

ii يقول...

الكويت يقدرون يصيرون بحال احسن من هذا بالف مره
بس حسافه محد فاهم او مهتم انه يكور الكويت
يعني مثلا دبي الجو مثل جو الكويت
والمولات موجوده بكل محل
وفيها شوي تفتح على الاقل تقدر تجذب السياح الخليجيين او السعوديين بشكل اكبر من الامارات بحكم ان السياح السعوديين يروحون يزورون اهلهم وبنفس الوقت سياحه والدوله تستفيد منهم بعد