13‏/07‏/2005

الله لا يصبحكم بهالصباح



أتمني من الله ان لايجعلكم من اللي دمهم نسبة الحلاوة فيه زايده

يعني بإختصار مثلنا نحن الكويتيين الدرجة الاولى
أصحاب مرض السكر

اليوم وانا أفتر بالبلوجات سيرت على المدونه الجديده لأخونا بو مريوم

وطلع ان بينا روابط وصفات مشتركه

منها اننا دمنا حلو بزياده عن اللزوم

زميلنا بو مريوم أنشئ مدونه جديده تختص بمرض العصر

http://sokaar.blogspot.com/


فا ذكرني باليوم اللي اكتشفت فيه مرض السكر عندي او مثل ما يحب الدكتور بن نخي يسميه
مرض الاعصاب الرقيقه

والله يا جماعه ما ادري شنو اقول
ناس سكرها زياده واعصابها رقيقه
قمة الرومانسيه والحلاوة إحنا

اترككم مع مداخلتي اللي كانت عن طريق أكتشافه

أكره أغنية عندي أهي أغنية عبدالمجيد عبدالله منت رايق فيك شي ومتضايق
الصبح وانا رايح قصر دسمان ( مو بيتنا يعني التجنيد لا تروحون بذاك الراي وتقولون الاخ بيعيش) المهم لا بس هالبدله الحمره وعايش الدور على الخط السريع والا الاغنية هابه بوجهي من هالمسجل والنفس بروحها كلش تجنيد وحرس سلام خذ ومراكض وما قمت ارمق نفس قبل العيون ما ادري اشفيها والريق كله ناشف والاغنية شغاله منت رايق منت رايق فيك شي ومتضايق انزين يا عبدالمجيد انا متضايق خلقه والا على يساري الجابرية قلت ما يبيله وبنفس الوقت كنت اوسوس من كثرة تلبية نداء الطبيعه( اعزكم الله )قلت ياللا حجه

وحاجه ودخلنا مبارك الكبيرواسدحوني يوميين

وقالي الدكتور يا استاذ خالد انت كويتي

قلت له اشرايك دكتور

قال لا انت كويتي بس سؤال كده انت عندك اقساط
قلت له ولو ان مالك شغل بس اي
قال خلاص انت كويتي اصلي مع مرتبة الشرف اتفضل دفتر السكر

أتمنى من الله العلي القدير ان يشافي كل مسلم ويبعد عنكم الامراض

وسلامتكم
إرسال تعليق